EDITORYAL - Nagkahiusa tungod ni Pacquiao

Kaanindot tan-awon ug palandongon nga sud lang sa pipila ka takna niadtong miaging Domingo nagkahiusa ang katawhan ning atong nagkabungkag-bungkag man unta nga nasud. Salamat ni Manny Pacquiao kinsa gihugopan sa iyang mga kaigsuonang Pilipinhon atol sa iyang pakig-engkwentro ni Erik Morales sa Mexico.

Bisan ang mga badlongong politiko kinsa ang pagdinautay lang sa usag usa maoy kanunay'ng himuon nagkahiusa sud lang sa pipila ka oras. Mao usab kadto mga managsilingan nga sa dugay'ng panahon wala magtinagdanay dungan nga miabiba kang Pacquiao apil pa gani ang paglamanohay ug pagginaksanay.

Ang wala makab-ut sa mga pundok nga naninguhang mohari ang kalinaw ug pasinabtanay sa atong nasud nakab-ot ni Pacman.

Kini hinuon makadiyot ra nga panaghiusa ug pagsinabtanay apan mipakita nga posibleng magkahiusa ang Pinoy kon anaay pipila ka mga tawo sama ni Pacquiao nga mahimo nilang hugopan dili lang sud sa pipila ka takna kundili sa tanang higayon.