Dormant nga account kuno

Lain na usab kining modus operandi sa mga badlongon sa katilingban nga nagsirkular karon sa internet. Maayong masayod kamo mahitungod niining maong estilo sa modus aron makabantay kamo ug dili mailad.

Ang estilo mao nga adunay magpadala kanimo og e-mail (kun ikaw adunay e-mail account) nga ang subject "Grab The Opportunity" o ba kaha "Waiting For Your Immediate Reply." Posible sab hinuon nga mogamit pa silag laing subject diha sa ilang e-mail kanimo aron mainteres ka sa pag-abli og pagbasa niini.

Ang magpadala og e-mail magpaila nga usa ka chief accounting officer sa usa ka bangko nga atua magbase sa south Africa. Sa samang higayon, siya (kuno) ang account officer sa usa sa ilang mga kustomer o kliyente nga namatay na.

Base sa iyang e-mail, ang mao nilang kustomer o kliyente adunay account sa ilang bangko nga may sulod nga binilyon ka dolyares. Apan ang maong account nahimong dormant ug unclaimed tungod sa unavailability sa labing duol niining paryente. Sa laktod, ang mao nilang client walay paryente didto sa South Africa nga mao untay maka-claim sa account niini.

Dugang niini, pasabton ka sa nagpadala sa e-mail nga base sa estate laws sa South Africa, kinahanglang makakita gayod silang taga bangko og maka-claim sa account sa ilang kliyente nga namatay aron dili sila (taga bangko) mapasakaan og kaso nga plunder.

Tungod niini, ila ka (kuno) nga hangyoon nga maoy mobarog nga next kin or relative sa ilang kliyente nga namatay aron ikaw maoy mo-claim sa dakong kuwarta nga sulod sa account niini. Ayaw gayod kamog tuo niini kay sa himanhiman, kamo pa hinuon ang makuwartahan. Kamoy mabiktima sa tinonto.

Dako man god kining binuang. Una, tuohan kaha sa balaod sa South Africa nga ang kliyente nga namatay may paryente dinhi sa Pilipinas nga wala man gani kaha kini paryente didto sa South Africa diin lumad kining tumitindok? Ikaduha, unsaon nimo pagmatuod nga paryente gayod nimo ang Aprikano nilang kliyente? Pastilan!

(Sumbong ug reklamo? Text sa 0910-8105522)