Ang Ginoo isip campaign manager

Mihinay-hinay nag tumaw kining mga politiko nga nag-ambisyon pagdagan karong umaabot nga eleksyon. Kagahapon, atong nabasa sa mga nasyonal nga pamantalaan nga nagka-init na ang sangka didto sa uban nga mga lugar bisan pa man nga wala pa magsugod ang election period.

Diha'y politiko nga misulti sa mga nag-interview kaniya nga molansar siya sa usa ka posisyon tungod kay mao kini ang pagbuot sa Ginoo.Wala kita masayud kun nganong iyang gipasanginlan ang Ginoo sa iyang desisyon nga nakab-ot, nga unta kining politika gitawag man sa uban og "duwa sa yawa." Tinuod nga ang tanan nga mahitabo kanato dinhi sa kalibutan pagbuot sa Ginoo, apan tingali makasulti lamang kita nga ang paghupot og usa ka posisyon pagbuot sa Ginoo kun inig kahuman sa piniliay, siya gayud ang mogawas nga mananaog.

Adunay mga kandidato nga walang-wala gyud, apan mogawas gihapon nga mananaog. Sama niadtong Pusyon Bisaya sa 1978 nga gitabangan og kontra sa mga higanteng politiko nga gisuportahan ni kanhi Presidente Marcos. Bisan pa sa kakulang sa kwarta ug mga kahigayonan, milampos ang Pusyon Bisaya tungod sa suporta sa katawhan. Mao kadto ang tinuod nga "Vox populi, vox Dei", kay ang tingog sa katawhan tim-os man ug wala mahiloi sa kwarta. Alang kanako, kadto pagbuot sa Ginoo. Gani, tungod niadto, ang mga botante sa Sugbo ug ubang bahin sa Central Visayas nakaani sa pagtahod sa ubang mga lugar isip mga "politically mature" kunohay nga mga botante.

Nahinumdom ako sa lecture sa usa ka kanhi COMELEC Chairman sa among Mandatory Continuing Legal Education. Miasoy siya bahin sa usa ka kandidata nga mipasar sa iyang Certificate of Candidacy isip Presidente sa Pilipinas. Nagpaila kini kaniya nga usa ka bisaya, ug iya kining giabi-abi. Matud pa sa maong kandidata, kinsa wala pa sukad-masukad makaapil sa politika, milansar kuno siya kay gisultihan siya sa Ginoo nga siya ang mamahimong Presidente sa Pilipinas, ug inig ka presidente na niya, iya kunong himoon nga bise-presidente ang COMELEC Chairman. Mao-mao usab kadtong panahona nga diha usay mipasar og Certificate of Candidacy isip Presidente sa Pilipinas nga nagsul-ob og sapot ni Hesukristo, ug gisuhid niini ang may-ong ni Hesukristo. Ang nahitabo, gideklarar sa COMELEC nga nuisance candidate ang duruha. Wa magsilbi ang ilang pamasangil sa Ginoo.

Daghan sa mga politiko ang moduol sa mga anaa sa simbahan kay aron mangayo sa pag-endorsar niini atol sa kampanya. Dinhi sa atoa, daghan usab nga mga anaa sa simbahan nga nanggilabot sa politika. Matud pa sa uban kanila, angay lang silang magpakabana tungod kay ang simbahan adunay kalabutan sa kahimtang sa nasud. Apan matud pa usab sa mga misupak, nga ang Batakang Balaod nag-ingon nga kinahanglan nga ang gobyerno dili manghilabot sa simbahan, ug ang simbahan usab dili manghilabot sa politika, ug nga ang ila lamang kalabutan sa pang-gobyerno mao lamang ang pagbotar sa tagsa-tagsa nila ka kaugalingon, ug dili ang pagpangampanya o paggamit sa ngalan sa Ginoo sa pagpangampanya.

Alang sa inyong mga panahom ug reaksyon, palihug e-mail sa [email protected] o text sa 0915-5536986. Daghang salamat.