May pipila na ka higayon nga nahisgotan nato ang mahitungod sa mga habal-habal diha sa Consolacion. Ang atong paghisgot gibase sa mga text nga atong nadawat gikan sa atong mga magbabasa nga nakaobserbar sa gihimo sa pipila ka driver sa habal-habal diha sa maong dapit. Gihisgotan ko kini aron masayod ang publiko nga may napuwerhisyo ug nahasol sa binuang sa ubang habal-habal driver.
Karon, may lain na usab nga text nga akong nadawat nga mireklamo gihapon bahin sa mga habal-habal diha sa Consolacion. Pinaagi ning maong text, padayonon nato ang pagdugkal nianang maong mga driver hangtod nga sila makaamgo nga may nahasol diay sa ilang gihimo. Basin pa diay....!
Ang text nagkanayon: "Kabahin gihapon kini nianang mga habal-habal sa Consolacion. Mga abusado sila! I-parking man tuod nila ang ilang motorsiklo sa daplin pero ibabag, dili uyon sa highway. Peligro kaayo nga masaghiran sa mga motorista. Pun-an pa gyod nga magpataka lang silag u-turn, samot. Unya kun hapit nato madam-agi, kita pa ang tulisokon sa ilang tudlo dalang yawyaw ngano kunong dili ta magtan-aw." -- 0928-3880959 (Oct. 1, 2006-17:57:07)
Morag bagad na sa tawo nga kon makasala gani, mangita dayon og planggana ug manghunaw. Mao nga dili na kita mahibulong kon dunay mga driver og habal-habal o ubang public utility vehicles nga maoy kusog manulisok bisan maoy nakasala. Manghinaot lang kita nga madisiplinag diyotay kanang mga abusadong driver og habal-habal diha sa Consolacion.
Sa laing bahin: "Karong panahona angay nga ang cellphone prepaid SIMPack nakaregister sa Globe, Smart, Talk 'N Text ug Sun Cellular para ma-trace ang mga binuang ug pangilad sa mga tawo." -- 0919-8047963 (Sept. 28, 2006-14:06)
Kuwang kog pagsalig nga ang maong paagi makasulbad sa hingpit sa pangilad pinaagi sa text. Nagtuo kong malutsan gihapon kini. Ang mas maayong buhaton mao ang pag-amping.
(Sumbong ug reklamo/ Text sa 0910-8105522)