EDITORYAL — Overpass nga dunay escalator

Gipatun-an ni Mandaue City Mayor Teddy Ouano sa mga eksperto ang iyang plano sa paghimo'g mga skywalk nga adunay escalators.

Dunay usa ka radio caller nga mikatawa. Kataw-anan kunong planoha kay asa man ka kakita'g skywalk kon overpass nga dunay escalator.

Dili baya ni kataw-anan. Ug dili baya tinuod nga wala pay overpass nga dunay escalator.

Didto sa Singapore, dunay mga overpass (dili skywalk ang ilang tawag niini) nga dunay escalator. Usa niini atong "nasakyan" didto sa may Scotts Road atbang sa Far East department stores.

Angay'ng suportahan sa mga senior citizen kining plano ni Mayor Ouano kay sila ang labing makapahimus niini. Dili ikalalis nga daghan sa atong mga senior citizens ang misalikway sa skywalk tungod sa kataas sa hagdanan nga ilang sak-on.

Makapahimus sab niini ang mga masakiton ug mga babayeng mabdos.

Angayan nga estudyuhan sa mga opisyal sa Mandaue kining plano ni Mayor Ouano.