EDITORYAL - Laing kadungganan alang sa Sugbo

Tungod kay nasentro ang atensiyon sa katawhan ngadto sa Cebu International Convention Center (CICC) ug sa kontrobersiya nga nagpalibot niini, daghan ang wa makamatikod sa laing usa ka dakong kadaugan sa Sugbo sa natad sa ekonomikanhong kalihukan.

Ang atong buot ipasabot mao ang paglusad di pa lang dugay sa usa ka higanteng barko diha sa shipyard sa Tsuneishi Heavy Industries (Cebu) Inc. sa lungsod sa Balamban.

Ang maong barko nga gitawag og car carrier kun kargahanan sa mga awto ug trak, adunay kapasidad nga 5,100 ka mga awto o 4,300 ka mga awto ug trak.

Gi-order kining maong barko sa usa ka shipping company sa Norway ug human sa paglusad niini namatikdan dayon sa global shipping community. Adunay ikaduhang order sa susamang barko ang nadawat sa Balamban shipyard.

Usa kini ka dakong dungog sa Sugbo dili lang sa Pilipinas kun dili usab sa tibuok kalibutan.

Miapil kami sa selebrasyon sa maong kadungganan ug miduyog usab kami sa panghinaut nga magpadayon ang kalambuan sa shipbuilding industry sa Balamban.