Sugal daplin sa karsada

Daghan gayod ang mipadangat og reklamo diri nako kalabot sa paghitak sa sugal sa lainlaing dapit. Dunay sugal nga anha lang ipahigayon sa mga aseras ning dakbayan. Ang uban anha nimo makita sa karsada paingon sa pantalan. Makapahibulong kaayo kon nganong wala man sikopa kining mga tawhana nga unta dayag man ang ilang pagsugal. Legal ba diay ang ilang pagsugal? Ambot lang.

Dili lang kay sa mga siyudad ra mahitabo ang dayag nga pagsugal kondili lakip na usab sa kalungsuran. Usa ka magbabasa niining lindog mi-text nga nagkanayon: "Maayo untag mabantayan ni sa mga polis sa Borbon. Naay nagsugal sa daplin sa karsada wala gyod dakpa." -- 0918-4104544 (Oct. 13, 2006-12:5041)

Maayo unta kon mahimoan og aksiyon sa mga buotang kapolisan sa Borbon kining sumbong nga gipadangat sa atong texter. Nahitabo kini sa Poblacion Borbon. Dili angay pasagdan ang sugal tungod kay usa kini sa mahimong hinungdan nga dili na motrabaho ang tawo kon maungo na sa sugal. Adto na lang siya magyampungad sa sugalan kon mahingag na siyag maayo niini.

Manghinaot kita nga masubay sa atong mga awtoridad kining maong sumbong aron masanta, sa usa ka paagi o sa lain, ang mga sugarol.

* * *

Sa laing bahin: "Naa koy reklamo bahin niining number nga 0916-8478334. Bastos kaayo ang iyang mga text. Gibinuangan kog text sa tag-iya niini nga numero. Gipadad-an kog bastos nga mga message. -- 0921-6982081 (Oct. 14, 2006-08-18:17)

Ang One-Stop Public Assistance (OSPAC) kaniadto pang naglusad og kampanya nga manalipod niadtong mga biktima sa text scams, malicious text messages ug uban pa. Isumbong kini ngadto sa (02) 926-7722 ug (032) 345-0823. Mahimo sab nga ipaagi sa text ngadto sa *888. Maayo god nga ato kining isumbong ngadto sa

NTC kay kon pasagdan lang nato, magdasa kining bastos nga mga texter.

Lain pang tigpadala og bastos ug makadisturbo nga text messages mao ang numero 0921-6865904. Nanghambog ra ba kining tawhana nga daghan siyag kailang taga media. Mao tingaliy iyang gisaligan sa iyang pagbinastos.

(Sumbong ug reklamo? Text sa 0910-8105522)