Dispatser sa Cabangcalan

Midagsang gayod pag-ayo ang mga dispatser sa bisan asang dapit. Nakadulot silag puwerhisyo ngadto sa mga driver. Pero ang mga driver moduko na lang ug magpaawot. Unsaon nga kon mopalag sila sa maong mga dispatser, mas modako man hinuon ang ilang problema ilabi na kon dumtan sila sa mga dispatser.

Mao nga napugos ang maong mga driver sa pagpahinunot sa modus operandi sa mga dispatser basta lang dili maparalisar ang ilang panginabuhi. Mao nga angay gayod untang santaon ug sumpoon sa hingpit ang mga dispatser. Kanang magsakay ko og jeep unya makakita ko nga delihinsiyaan sa dispatser ang driver sa jeep nga akong gisakyan, bation gyod og kabidli ang akong ginhawaan. Pero igo lang kong makapanglingo. Wala man gani makabadlong ang mga awtoridad, ako pa kaha?

Diha sa Cabangcalan, Mandaue City, duna usay mga dispatser diha nga nakapuwerhisyo sa mga driver. Matud pa sa tag-iya sa cellphone number 0910-7352212, kining maong mga dispatser anaa diha sa Cabangcalan Tumoy. Nahasol pag-ayo ang mga driver sa gihimo niining maong mga dispatser nga ang leader giila sa atong texter nga usa ka alyas R. Pangag. Napuwerhisyo ang mga driver tungod kay abusado kining maong mga dispatser busa maayo unta kon mapitol kini sila.

* * *

Nakadawat kog text gikan sa tag-iya sa cellphone number 0920-3267257 nga nagtaho nga aduna pay tulo ka classrooms sa Guinsay National High School nga sulirap ang giatop. Kon mag-uwan, mahunong kuno ang klase kay mangabasa man intawon ang mga tinun-an.Kon tinuod man, suliran kini sa mga tinun-an ug mga magtutudlo.

Wala ko makaseguro kon tinuod ba kini o dili kay wala akoy personal knowledge niini. Pero gihisgotan ko kini kay nakita ko man nga walay daotang tumong ang text nga akong nadawat. Hinuon, ang maong kasayoran makatabang aron kapangitaan og sulbad ang maong problema. Mao nga angay kining susihon sa mga hingtungdan aron kapangitaan og solusyon kining maong suliran kon tinuod man.

(Sumbong ug reklamo? Text sa 0910-8105522)