G-W@PS modelo sa uban

Dakong tikang ngadto sa pagpalambo sa serbisyo ang bag-ong programa sa Government Service Insurance System (GSIS) nga mao ang G-W@PS kun GSIS-Wireless Automated Processing System nga gilusad didto sa isla sa Camiguin niadtong Oktubre 26, 2006.

Ikapanghambog kaayo ang programa natong mga Pilipino, kay matud pa sa presidente ug general manager sa GSIS, Winston Garcia, una kini nga gitanyag insurance system sa gobyerno sa kalibutan dinhi sa Pilipinas.

Alang sa wala pa makasabot niining G-W@PS, ang GSIS mopakatap og electronic touchscreen nga sama og ATM machine sa mga lugar nga layo sa mga buhatan sa GSIS sama sa mga isla ug kabukiran sa probinsiya.

Unya, niining mga G-W@PS e-touchscreen, mahimo nang maka-transact ang mga miyembro sa GSIS, sama sa pag-aplay og loan.

Nindot kaayo kini kay pananglit ang miyembro mangaplay na og loan, wala nay papel nga mausik sa GSIS kay sa G-WAPS e-touchscreen, nga gitawag nila og G-W@PS Kiosk, iproseso unya kun ma-aprobar na, adunay madawat nga text message ang miyembro nga mahimo nang ma-withdraw sa ATM ginamit ang e-card ang salapi.

Maisip nga 'portable government office' ang G-W@PS Kiosk tungod kay anhi na modangop ang mga miyembro sa GSIS sa transaksiyon nga buot niyang sudlan.

Dili man gud lalim ang paglinya-linya aron lang ikumpleto ang transaksiyon diha sa GSIS. Wala lang ko makatayming sa GSIS, apan kun makasuroy lang kamo sa Social Security System (SSS), puwerteng luoya sa mga miyembro niini nga gikan pa sa kalungsoran nga mosugod og apil sa lumbay alas 5 pa sa kaadlawon. Kun mao kini ang sitwasyon sa SSS, seguro ko nga mao usab kini ang sitwasyon sa GSIS sa dili pa makumpleto ang pagpakatap og G-W@PS Kiosk sa mga isla ug kalungsuran.

Mao usab unta kini ang hunahunaon sa ubang mga ahensiya sa gobyerno nga adunay tag-as nga processing sa mga transaksiyon sama sa SSS ug sa National Statistics Office (NSO) paghimo og mga 'innovation' ginamit ang information technology nga mopamubo na lamang sa mga transaksiyon.

Suroya gani ninyo kanang bag-ong buhatan sa NSO alas 5 sa kaadlawon, puwerte nang daghanang naglinya sa karsada nag-antos sa katun-og sa panahon aron makahuman og sayo-sayo sa transaksiyon. Diha gani gi-estorya kanako ang drayber sa taksi nga diha kadtoy taga amihanang probinsiya sa Sugbo nga duha ka adlaw nang nagbalikbalik og linya sa NSO kay wala matiwas dayon ang iyang transaksiyon.

Busa, kanang G-W@PS sa GSIS magsilbeng "model" sa ubang ahensiya sa kagamhanan nga adunay mga tag-as nga proseso pagkumpleto sa transaksiyon.

* * *

IMBESTIGASYON. Nanguli na sa kauluhan ang tulo ka abogado nga gipadala dinhi sa Port of Cebu aron pag-imbestigar sa mga kawani sa Bureau of Customs - Cebu mahitungod niadtong pagsulay og kawat sa upat ka mga right hand drive nga mga sakyanan nga gisakmit na pabor sa kagamhanan.

Si Leonito Santiago, hepe sa Customs Intelligence and Investigation Service - Operations, mibutyag nga nakuhaan na sa Investigation and Internal Prosecution Division sa BOC og pamahayag ang tanang mga kawani ug opisyal sa BOC-Cebu nga nasuta sa inisyal nga imbestigasyon nga adunay kalambigitan sa pagkawat sa duha ka Nissan Terrano, usa ka Toyota Celica, ug usa ka Mitsubishi Pajero.

Ang IIPD maoy gitahasan ni Commissioner Napoleon Morales pagsusi aron masayran kinsay angayang taralon sa hukmanan tungod sa pagkawat sa butang nga iya na sa gobyerno.

Ang maong upat ka sakyanan nasakmit sa operatiba sa CIIS-Operation pinanguluhan ni Santiago gikan sa consignee niini nga mao ang GLRC Auto Parts sa Larena, Siquijor (?) niadtong Marso.

Apan gisulayan pa gyud og kawat bisan na-isyuhan na kini og warrant of seizure and detention (WSD) ni kanhi Cebu Customs Collector Ma. Lourdes Mangaoang.

Mao ra gyuy nakadaot anang mga smuggler, kun madakpan ilang gi-smuggle nga mga butang sama nianang upat ka sakyanan, buhaton kutob sa mahimo aron mapagawas gikan sa Cebu International Port.

Ang swing operations sa mga karahong dagko diha sa adwana dugay nang nanghitabo, apan karon lang kini nabulilyaso tungod kay sa atong report nga nadawat wala maayo pagkabahin ang 'pordaboys' (kuno) unya aduna pa gyuy 'pordaboys' nga wala maabot sa tukmang kamot.

Manghinaot lang ta nga dili moapil sa pista ang IIPD ug matinud-anon sila sa ilang imbestigasyon aron mataral sa hukmanan ang mga tawong tinuod nga nalambigit sa kontrobersiya.