Magbutang og outpost

Padayon nga midagsang karon ang mga kaso sa tulis. Morag maghilak ang adlaw kon walay mabiktima sa panulis. Ang nakapait ra ba kay patyon pa gyod sa mga tulisan ang kasagaran sa ilang biktimahon. Ang giingong mga secret marshals nga magsakaysakay sa mga depasaherong sakyanan wala gani makahulga sa mga tulisan.

Usa sa mga tulis prone area sa dakbayan sa Sugbo mao kanang dalan C. Padilla. Daghan na kaayong mga tulis nga nahitabo dinhang dapita. Morag dakong grupo sa mga tulisan ang nag-operate dihang dapita ug ang kasagaran nilang biktimahon mao ang pasahero sa mga PUJ nga nagrota og Laray Inayawan.

Laing tulis prone area mao ang Highway Bulacao. Daghan na sab ang nahitabong tulis dihang dapita nga ang sagad biktimahon mao ang mga pasahero sa mga sakyanan nga nagrota og Bulacao, Talisay, Minglanilla ug sa uban pang kalungsuran habig sa South. Haskang paita!

Dugtong niini, nakadawat kog text nga nagkanayon: "Usa ko sa tigbasahan sa imong column. Ang ako untang gustong mahitabo mao nga mahatagan og pagtagad kanang dapit sa Tagunol. Diri sa Mambaling ug Cogon boundary, maayo unta kon magbutang sila og outpost sa police para malikayan na ang tulis. Usa ko sa daghang nabiktima sa pagpanulis." 0921-3372358 (Sept. 27, 2006-09:58:23)

* * *

Uyon ko sa sugyot sa atong texter. Maayo bitaw nga butangan og police outpost ang mga tulis prone area. Kanang outpost nga postehan gayod kanunay og police. Bentaha man god kon aduna gyoy police visibility. Mas epektibo pa gani tingali hinuon kini kay sa pagbutang og secret marshals sa mga publikong sakyanan.

Nindot man god kon adunay police outpost sa mga dapit diin sagad anha mag-operate ang mga tulisan aron duna dayoy kadangpan ang mga biktima ug dako ang posibilidad nga masikop dayon ang mga badlongon. Ang presensiya sa mga polis diha sa usa ka outpost, sa usa ka paagi o sa lain, makapakalma sa mga tulisan sa pagpasalir sa ilang modus operandi.

(Sumbong ug reklamo? Text sa 0910-8105522)