EDITORYAL - Ang handwriting sa mga doktor

Usa ka inahan ang nangutana sa The Ear sa The FREEMAN kon tuyoon ba gyud sa mga doktor nga pangil-aron ang ilang agi sa ilang prescription pad.

Kasagaran kuno hapit dili mabasa ang nasuwat sa prescription slip.

"Ngil-ad ba gyud og agi ang mga doktor o gipangil-ad na lang nila sa ila nang pagkadoktor?" nangutana si misis.

Matud niining maong inahan, nipalit siyag tambal para arthritic pain apan gihatagan siya sa pharmacy salesgirl og tambal para urinary tract infection. Kini tungod kay dili klaro ang nakasuwat sa prescription pad.

Makatarunganon ang reklamo sa inahan. Tungod kay kasagaran dili klaro ang agi sa doktor duna gyuy kahigayonan nga masayop ang paghatag sa tambal.

Maayo tingali nga klaro-klarohon ni doc ang pagsuwat sa medisina ug instruksyon sa pagtumar niini aron walay kasaypanan nga mahitabo.

"Kinabuhi sa pasyente ang nakataya dinhi," suma pa sa inahan. Ug kami mi-alayon kaniya.