EDITORYAL — Aprub ang Citom sa teargas

OK ra sa City Traffic Operation and Management (CITOM) kon ang mga traffic enforcers padad-on og teargas imbes armas de fuego.

Kahinumdoman nga si Mayor Tomas Osmeña mi-propose nga sa lugar sa pusil ang mga Citom traffic enforcer "armasan" og teargas.

Suma pang Citom Executive Director Arnel Tancinco ang maong sugyot sa mayor dugay nang giplano sa Citom board ug malaumon siya nga ang maong plano mahinayon na.

Daghan ang miuyon sa plano sa mayor, ilabi na kadtong suheto sa batasan sa pipila ka mga traffic enforcer nga dili kamao mosulbad sa problema tali sa mga drayber sa bugnaw nga paagi.

Apan gikinahanglan nga adunay mga lagda nga pagasundon kalabot sa paggamit sa teargas ug kanus-a kini gamita.

Tuod man mas maayo nga teargas ang ipadala sa mga Citom traffic enforcer aron kalikayan ang duguong hitabo atol sa panaglalis tali sa Citom ug mga drayber.