Kaniadtong miaging Lunes lain na usab nga minahan ang miboto. Ang pagboto sa tunnel sa minahan didto sa barangay Balaas lungsod sa Argao mikalas kini og usa ka kinabuhi ug miangol sa lain pang tulo ka mga minero. Matud pa ni Sr. Insp. Crisanto Duque, hepe sa kapolisan sa Argao nga akong nahinabi sa tulomanong saksi evening edition sa DySS kaniadtong Lunes sa gabii nga ang hinungdan sa pagbuto sa tunnel mao ang pag-spark sa kuryente dihang gikonektar sa mga minero ngadto sa blower human nila mamatikdi nga nanimahong methane gas ang tunnel. Patay diha-diha dayon sa maong insidente si Alfredo Behasa samtang ang iyang mga kauban niadtong higayona nalandig sa tambalanan human mahiagum sa second degree burn ug minor injury.
Tungod sa maong hitabo ang Department of Energy mipahunong sa operasyon sa minahan didto sa Argao ug mihimo dayon kini og imbestigasyon mahitungod sa maong hitabo.
Pila na ka buwan ang nakalabay daghan usab nga kinabuhi sa mga minero ang nakalas gumikan sa pagbuto sa minahan didto sa Dalaguete. Ning pagboto sa minahan didto sa Argao kaniadtong Lunes si kinsa ang may sala. Ang tagdumala ba sa minahan, mga minero o ang mga empleyado ug opisyal sa Department of Energy?
Kon ang tagdumala sa minahan naglantaw pa lamang unta sa kinabuhi sa ilang mga minero, seguro himuon gyod unta niini ang pagtuman sa mga patakaran nga gipasunod aron mahalikay sa peligro ang kinabuhi sa mga minero. Kon ang mga minero nag-amping pa lamang unta sa ilang gipanghimo ilawom sa tunnel sa minahan mahilayo unta kini sa peligro. Ug kon gipatuman pa unta sa hingpit sa departamento sa enerhiya ang ilang mga patakaran sa mga minahan ug kon gitinood pa unta kini nila sa pagpatuman, layo ra seguro sa peligro ang mga minero.
Kon si kinsa man ang sad-an, kamo lang ang nasayod.
Ang pagpahunong sa operasyon sa minahan dili maoy tukmang sulbad sa mga minahan nga miboto gumikan sa mga pagpabaya. Ang sulbad niini mao ang relihiyoso nga pagpatuman sa mga patakaran kansang katuyoan mao ang paghatag og kaseguroan ug kaluwasan sa mga minero. Ang pagsuspenso, makapawagtang lamang kini sa panginabuhian sa mga minero.