Saludo ko Sir!

Mitulo g'yod ang luha sa usa ka lumulopyo sa Lagtang, Talisay human siya gikonbikto sa korte sa pagpamaligya og shabu, dayon gisilotan nga mabilanggo sa tibuok kinabuhi og pabayron pa og P800,000 nga multa.

Wala matagbaw ang hukmanan, bisan og pagkabilanggo na sa tibuok kinabuhi ang silot ngadto ni Arnold Tabuzo, apan gipakapinan pa g'yod og laing 15 ka tuig nga pagkapriso tungod sa paghupot og tulo ka paketeng shabu.

Labing maayo unta kon kadtong mga lusok sa luha nga milugmaw gikan sa mga mata ni Tabuzo, magsilbi unta nga awhag ngadto sa ubang drug pusher nga mohunong na kon wala pa sila madakpi.

* * *

Gibaliwala ni RTC judge Gabriel Ingles ang argumento ni Tabuzo nga gidakop siya sa mga sakop sa Philippine Drug Enforcement Agency tungod kay nagpanuko siya pagtug-an sa mga pusher sa ilang dapit.

Wala masayop si judge Ingles kay hilabihan kataphaw sa maong argumento ni Tabuzo. Dili mga utok-bulinaw ang taga PDEA nga moadto sa Lagtang nga adto pa magpangutana kon kinsa ang ilang dakponon.

Usa ra kini ka "elementary rule" nga kon ang kapolisan mopahigayon gani og buy-bust operation, masayod na silang daan kon kinsa ang ilang tumong nga dakponon.

Usbon nako, mas labing maayo unta og ang gidangatan ni Tabuzo kakutloan og pagtulon-an sa ubang mga drug pusher nga padayon pa karong nagbaligya og gidiling matang sa drugas.

Timan-i kini ninyo, moabut ra ang adlaw nga mahulog kamo sa mga kamot sa tinugyanan sa balaod.

* * *

Ang kaisog ni SPO1 Meliton Agadier pagresponde sa usa ka pagpanulis sa mga pasahero sa PUJ kaniadtong Domingo, bisan og siya usa ka polis nga tua sa Carcar madistino, dalaygon g'yod kaayo.

Daan na hinoon ko nga misaludo ni SPO1 Agadier. Napatay niya ang usa ka tulisan ug nadakpan ang kauban. Gipasakaan na gani og kaso didto sa hukmanan kagahapon kadtong iyang nadakpan.

Nahinumdom usab ko kaniadto nga dihay pagpamusil didto sa Sibonga, si Agadier ug laing polis, nagtinabangay usab paggukod hangtud nadakpan ang mga kriminal.

Saludo ko sa iyang kasinsero nga polis. Tingali kon usa pa usab ako ka polis, ingon usab niini ang akong buhaton. Ang usa ka polis, dili angay nga kalisangan sa mga tawo, apan kadtong mga badlongon angay'ng mahadlok kanila.

Husto si Mayor Osmeña nga mohatag og P20,000 nga ganti ni SPO1 Agadier. Gawas nga gitanyagan ni Mayor Tommy nga si Agadier mobalhin sa dakbayan sa Sugbo, isugyot usab nako nga ilakip siya sa mga awardees unya sa Charter Day sa dakbayan karong Febrero 24, sunod tuig.

Unya, kamong ubang polis diha, dili ba kamo masina ni Agadier?

* * *

Kon ang usa ka opisyal sa kapolisan nga madistino isip commander sa usa ka kampo, unya magdali-dali kini pagtukod og iyang balay diha sulod sa maong government property, unya dili niya gub-on kon wala na siya madistino diha, usa kini ka dakung pagpahimulos sa higayon.

Ingon niini ang batasan sa usa ka Koronel sa kapolisan nga ibutyag ra nako ninyo ang ngalan sa umaabot nga mga adlaw.

Kining maong opisyal, gisaway pag-ayo sa iyang mga subordinate officials kaniadto kay gihulagway nila nga mapahimuslanon sa higayon. Ang maayo nimo Kernel, gub-a na kanang imong balay sulod sa kampo.

Ug mao kini ang batasan sa tanang opisyal, moabot ang higayon nga ang mga kampo pulos na lang balay. Unya, ayaw ko'g ingna nga nakahuna-huna ka na sab nga mopasaka og kaso kay gihisgutan ni?

Basin og moingon ka nga nagtinalawan ko kay wala ibutyag ang imong ngalan Kernel, paabota lang.