Kapamilyang negosyo

Panghuy-ab kon di man paghagok ang kasagarang nasugatan sa nangaging mga pagsuway pagtudlo sa labing kabos nga hut-ong sa katilingban unsaon pagsugod sa ilang kaugalingong mga patigayon, inay nga moapil sa way kinutobang pila sa mga anak sa singot nga nangandoy nga makatrabaho. Ang patigayon, alang sa kinabag-an nga gipanggutom, mas lisod ispilingon kay sa paghaw-as gikan sa katimawa.

Mao ni hinungdan sa kapakyas sa nangaging mga pagsuway pagdani sa kinabag-an sa katawhan-nga maoy labing nagkinahanglan sa katakos paglingkawas sa katimawa sa ilang kaugalingong mga paningkamot-pagkat-on sa patigayon. Apan wa ni kapatagam sa pipila ka mga tawo nga pulos nangandoy og mas sanag nga kaugmaon alang sa labing naapiking mga hut-ong sa katilingban.

* * *

Unang nahunahunaan nilang Joni Chan, Maria Pino ug Rene Paquibut mao ang paghatag og puhonan nga ikasugod og patigayon. Apan nasuwayan na ni niadto. Ug di makadasig ang sangpotanan. Ang kasagaran sa gipanghatag nga puhonan gigamit sa laing katuyoan-apil nang mas dinaliang panginahanglan sa mga sakop sa pamilya sama sa tambal ug matrikula-maong wa gyoy patigayon nga nitunhay.

Apan si Joni, nga may tindahan sa Carbon; Maria, nga pangu sa sidewalk vendors sa Sugbo; ug Rene, assistant dean sa College of Commerce sa University of San Carlos, wa igdungog sa sayon nga paglunga sa mahiagomang mga kahiwian. Maong ila kong giduhig sa ilang damgo.

* * *

Gawas sa libreng puhonan, nisugyot ko nga ang tulomanong isibya sa DYAB Abante Bisaya mosunod sa matag lakang sa linghod ug gagmayng mga magpapatigayon, gikan sa pagparehistro, pagpabarug, pagpabuylo pagpalapad o, ug pasayloang kamahilihon nako pagpangandam sa ngitngit nga mga sangpotanan, pagkalup-og sa ilang mga negosyo. Naglaom kong kasustinihan namo ang pagsunod sa mga pagsuway, kasinatian, kalamposan ug, pasayloang akong kamahiligon pagpanagana sa mga bulilyaso, kapakyasan sa mga mapilian nga hatagan og pasiunang puhonan. Inay magsige og sunod sa away ug pagarpar sa mga politiko, alang nako mas undanon ang sugilanon sa tinuod nga mga tawo nga nihimo og tinuod nga pagsuway pag-umol sa tinuod nga kausaban sa tinuod nilang mga kinabuhi.

* * *

Nahingpit ang hulagway dihang nadani namo si Devin Go, presidente sa USC College of Commerce Alumni Association. Ubos sa hingpit nga pagpaluyo sa dean sa College of Commerce nga si Fr. Mark Mathias, nagkauyon ang nagpakabanang Carolinians pagtanyag og P100,000 nga pasiunang puhonan. Mao ni bahinon sa contestants nga pilion pinasikad sa labing yanong business plans nga maumol human sa ilang pagtambong sa seminars ug workshops sa mga patigayon ug panginabuhi nga dumalahon labing inilang mga eksperto sa negosyo sa Sugbo.

Pormal nga gilusad ang "Kapamilyang Negosyo" atol sa Kapamilya Media Forum sa DYAB Abante Bisaya ug Sky Cable sa SM City. Mabati ni matag Sabado sa buntag, alas-8 hangtod alas-10, uban nilang Jun Tariman ug sa panel sa nagpakabanang Carolinians.

Email:[email protected]