Salapi o kinaadman?

Adunay panultihon nga nagaingon, "Paningkamot ug eskuyla kay ang kinaadman o edukasyon maoy usa ka butang dinhi sa kalibotan nga dili gyud makawat gikan sa tag-iya."

Apan mangutana kita: Hain may labaw sa duha? Salapi o kinaadman ba hinoon? Ang uban kanato moingon nga labaw ang salapi apan kadaghanan usab nagatuo nga mas labaw ang edukasyon o kinaadman.

Ngano man? Kay sa katilingban nato karon, daghan sa atong mga propesyonal haruhay ang ilang kahimtang sama sa usa ka abogado, doktor, accountant, enhinyero, nars, kapitan sa barko ug uban pa.

Kining mga tawhana sa hut-ong sa atong katilingban wala gyud kaayo mapiit ug mag-antos sa ekonomikanhong krisis nga mihapak ug mikastigo sa atong nasud.

Sa laing pagkasulti, wala ba kahay kalambigitan ang salapi sa pagkab-ot nila ning mga kursoha?

Ang tubag niini mao nga dako kaayog kalambigitan ug natampo ang salapi niining mga butanga. Tungod kay sa pagsugod pa lang nato og eskuyla gikan sa elementarya hangtod sa kolehiyo kon college, nahilambigit na kaayo ang salapi niini.

Sa balon lang matag-adlaw, pila ka mga estudyante ang mopalta sa ilang klase gumikan lang ning butanga?

Nahilambigit usab ang salapi sa matrikula, uniporme ug uban pa. Busa, ubos ning tanan labaw ang salapi kay sa kinaadman. Dili makab-ot ang kinaadman kon walay sapi sa tinuoray lang nga pagkasulti.

Ang kinaadman segundo lang sa salapi gumikan sa mga katarungan nga giladlad na sa unahan. Busa, ubos sa hugot nakong pagtuo mas labaw sa pagkakinahanglanon ang salapi sa pagkab-ot sa kinaadman ilabi na gyud karong panahona.