Human nakapahimus og mas dakong kita sukad sa paggamit nila og LPG inay krudo o gasolina, ang kaliboan ka taxi drivers ug operators dunay dakong suliran human sa pag-ulbo sa Gene's Laundry sa Basak, Mandaue niadtong Lunes sa buntag: Ang Land Transportation Office (LTO) nikuwestiyon sa legalidad sa conversion sa ilang mga sakyanan.
Kay atol sa Kapamilya Media Forum sa DYAB Abante Bisaya ug Sky Cable sa SM City Entertainment Plaza, gipahibawo ni Zaide Bation, pangu sa Regulatory Division sa Department of Trade and Industry (DTI), nga wa pay bisan usa ka indibiduwal o kompaniya dinhi sa Sugbo nga gi-accredit pag-convert sa mga makina sa mga sakyanan gikan sa paggamit sa krudo o gasolina ngadto sa mas barato nga LPG.
Sa ato pa, ang gibanabanang 1,200 ka taxi units ug gatosan ka pribadong mga sakyanan ug ubang sakyanang pamasahero na-convert nga way pagtugot sa DTI. Ug ang converters nga nangolekta og hangtod P30,000 matag sakyanan wa diay accreditation sa DTI, nga mao untay mosusi sa ilang katakos pagtino nga luwas ang bag-ong teknolohiya alang sa kinabuhi ug kabtangan sa mga pasahero.
Ang maayong balita alang sa taxi drivers ug operators: Wa pay plano ang LTO pagsikop sa ilang mga sakyanan ni pagbakwi sa ilang mga prangkisa. Matud ni Atty. Vicente Gador Jr. sa LTO 7 mag-agad sila sa DTI kon unsay angay'ng himuon sa taxi units ug ubang mga sakyanan nga na-convert. Gawas pa, niangkon si Gador, nga dinapit sab sa media forum, nga wa pa sab siyay nabasahan nga balaod nga magsilot sa "unauthorized conversion" sa mga sakyanan.
Wa hinuon magharab-harab ang taxi drivers ug operators pagpa-convert sa ilang mga sakyanan. Pila ka tuig sa wa pang pag-ulbo sa Mandaue, silay labing kusganong nikuwestiyon sa kaluwas ug kahaom sa paggamit og LPG pagpadagan sa ilang mga sakyanan. Salamat sa paspas nga paglambo sa teknolohiya ug sa makalilisang nga paglayat sa presyo sa lana, nakabuylo ang conversion sa taxi units dinhi sa Sugbo sa niaging tuig.
Ang lagda sa accreditation sa DTI sa conversion sa mga sakyanan naumol niadtong 1983. Apan tungod sa kagamay ra sa mga naggamit sa LPG-bisan sa pasiunang kalamposan sa Sugbuanong imbentor nga si Johnny V. delos Reyes-wa ni matutoki sa DTI, hangtod sa trahedya sa LPG niadtong Lunes.
Silang Direktor Antonio Labios sa Department of Energy (DOE), Cebu City Fire Marshall Ismael Codilla ug Mandaue City Fire Marshall Oscar Mayol niawhag nga magsabot ang hingtungdang mga ahensiya aron pag-umol og mga lagda pagduma sa LPG ug ubang alternatibong enerhiya.
Gawas sa converted taxis, tutokan nilang wa say pananghid nga pagtukod og LPG refilling stations ug ang nagkadaghang mga industriya nga naggamit sa LPG kay mas barato kay sa lana ug kuryente.
Email:
leo_lastimosa@abs-cbn.com