Biliran!

September 7, alas 5:45 sa buntag. Nitimbakuwas ko sa kalisang sa akong nabati gikan sa pikas linya sa akong mobile phone. Gipusil ang kanhi gobernador sa lalawigan sa Biliran, Atty. Danilo Parilla. Di ko makatuo nga mahitabo ang bangis nga krimen human nako tabangi ang iyang asawa pagsiguro nga luwas ang akong Uyoan gikan sa suspek nga kasakay niya sa barko niadtong higayona.

Human sa kapin duha ka oras nga pakigbisog nga makasugakod sa samad sa ulo agi sa pinusilan, nabugtoan sa iyang kinabuhi ang kanhi gobernador sulod sa Chong Hua hospital. Dili makatuo ang tanan niyang kabanay ug mga taga Biliran sa paspas nga panghitabo ug sa gibuhat sa way puangod nga suspek. Ang kamatayon ni Atty. Parilla maoy nagbutang sa lalawigan sa Biliran sa tanang mantalaan dinhi sa Sugbo, gihisgutan sa mga istasyon sa radyo ug maoy nag-unang balita sa mga telebisyon.

Presko pa sa akong huna-huna ang paglingkod ni Atty. Parilla isip gobernador sa Biliran niadtong 1995. Puno sa kadasig ang mga Biliranon isip usa sa labing bag-ong nahimugsong probinsya sa nasud. Naningkamot ang maong dapit nga maila sa tibuok nasud isip malinawon ug malambuon. Atol sa iyang paglingkod, ang Biliran ang nahimong cleanest and greenest province sa tibuok rehiyon otso. Lig-on ang kampanya sa lalawigan batok sa ginadiling droga isip nag-unang pag-alkontra sa kriminalidad sa lalawigan.

Apan ang dili nako makalimtan mao ang kanunay niyang pahinumduman namong iyang pamilya nga walay bisag usa kanamo ang mo-abuso ug maghupot og dakong posisyon sa gobyerno sa Biliran. Ang maong pasidaan maoy nahipatik sa akong huna-huna samtang nagsud-ong ko sa iyang patay'ng lawas. Sa iyang pagtaliwan, dili nako makalimtan ang iyang prinsipyo batok sa mga tawo nga abusado sa katilingban labi na kung kadugo niya ang maong tawo.

Gikan sa usa ka bag-ong nahimugsong lalawigan niadtong 1993, puno sa paglaom ang mga tawo sa maong dapit. Apan human sa kapin usa ka dekada, padayong gihapong naghandom sa kalambuan ang mga residente sa isla. Luyo sa kahimsog sa yuta sa maong dapit, mahibulong ka nganong dinhi sa Sugbo moangkat ug mga utanon ang mga tawo sa Biliran. Bisan ug gipalibutan ug dagat ang isla, mahibulong ka nganong ingon og dolyar kamahal ang isda ug uban pang pagkaong dagat. Sa kadaghan sa mga nindot nga tourist spots sa maong lalawigan, gikan sa mga waterfalls, nindot nga beach, ug kalasangan, mahibulong ka nganong wala maila ang maong lalawigan sa daghang mga lokal ug langyaw nga turista.

Ang kamatayon ni Atty. Parilla maoy nakaingon nga mas nailhan ang lalawigan sa Biliran dinhi sa Sugbo. Kung aduna may maayong anggulo sa kamatayon ni Parilla, kini mao nga dinhi sa Sugbo nahitabo ang krimen. Sa tabang sa kapulisan, nasikop ang suspek. Sa pagpakabana sa mga higalang abagado sa biktima, napasaka ang kaso. Sa pasalig sa mga lokal nga opisyal nga natandog sa maong balita, nahatagan og kaisog ang iyang pamilya nga makab-ot ang hustisya. Sa pagbangutan sa mga taga Biliran, nahupay ang kaguol nga gibati sa iyang asawa ug mga anak.

Sama sa akong mga kababayan sa Biliran, puno ang panghinaot nga makab-ot ang hustisya ug masilotan ang tawo nga nibuhat sa krimen. Daghan ang nag-ingon nga kompyansa ang biktima sa iyang siguridad sulod sa barko. Tinuod. Tungod kay sa dihang nabuhi pa ug naghupot pa ug posisyon sa gobyerno, wala mahadlok si Atty. Parilla sa iyang siguridad. Kanunay niyang isulti nga walay mahitabong dautan kaniya sa presensya sa mga taga Naval o mga taga Biliran. Pulos mga taga Biliran ang sakay sa barko atol sa krimen.

Padayon ang pakigbatok sa hustisya alang sa kamatayon sa gipatay nga kanhi gobernador. Dili lang ang iyang pamilya ang nanghinaot ug hustisya apan lakip na ang mga Biliranon. Sa maong paagi, dili lang unta maila ang Biliran tungod sa maong bangis nga krimen apan tungod sa walay gisanto nga hustisya.