Patay nga kamatuoran

Kaniadtong miaging Miyerkules sa boto nga 173 por 32 gilubong na gyod ang gipatay nga impeachment nga reklamo batok ni Presidente Gloria Macapagal-Arroyo. Kini bisan pa man sa mga pangaliyupo sa mga kongresista nga sakop sa opposition. Malipayon kaayo nga gipahibalo ni Speaker Jose De Venecia ang resulta sa botohan sa plenaryo mahitungod sa report sa komitiba ni kongresista SimeonDatumanong nga nagbasura o nagpatay sa reklamong impeachment batok sa presidente. Malipayon usab ang Presidente human kini masayod sa resulta sa botohan sa ubos balay balauranan.

Ang resulta sa botohan nga naglubong sa patay nga impeachment nga reklamo batok sa Presidente dili angayan nga ikalipay ni Speaker Jose De Venecia ug sa Presidente kana gumikan kay ang ilang gipatay dili ang impeachment batok sa Presidente kon dili ang atong batakang balaud ilabi na ang proceso nga impeachment.

Ang impeachment usa ka proceso nga gibutang sa atong batakang balaud diin ang katuyoan niini mao lamang ang pagtang-tang sa usa ka impeachable nga opisyal. Ug tungod sa gihimo sa mayorya sa ubos balay balauranan ilang gipatay ug gilubong kining maong proceso nga gibutang sa atong batakang balaud.

Giingon sa mayorya nga walay ebidencia batok sa Presidente. Apan giunsa man nila sa pagkahibalo nga walay ebidencia batok sa Presidente nga wala man nila tuguti ang opposition nga makasumiter sa ilang mga ebidencia.

Kay gipatay naman ug gilubong na ang impeachment batok sa Presidente ang publiko na lamang ang maghukom sa gihimo sa mga kongresista ug Presidente Gloria Macapagal Arroyo.

* * *

Gihagit ni Collector Ricardo Belmonte sa Bureau of Customs ang si kinsa man kadtong mipasangil nga naghitak ang palusot sa bugas humay dinhi sa Sugbo nga hinganlan niini ang kadtong nalambigit sa maong kalihukan. Unfortunately, si Collector Belmonte usa sa gipasanginlan nga mitabang sa pagproceso sa mga papel sa maong gipalusot nga mga humay. Ang pasangil batok ni Collector Belmonte lisod tuhoan ilabi na niadtong nasayod sa pagkatawo niini. Ang pamilyang Belmonte dugay na nga nagpadagan sa pamantalaang The Phil Star ug wa ta makadungog nga ni usa sa mga nagdala sa maong bansagon nalambigit sa mga kahiwian. Busa sa iyang mga kritiko, lisod ninyo nga tumbahon ang bansagong Belmonte nga nahimo na nga institution kon hisgutan ang pagdumala alang sa kaayohan sa katawhang Pilipinhon.