Leakage sa NAT?

Kon nalutsan ang nursing board exam, nganong di man kabinuangan ang National Achievement Test (NAT)? Si kanhi kongresista Joy Augustus Young, consultant ni Cebu City Mayor Tomas Osmeña alang sa edukasyon, kumbinsido nga duna gyoy binuang di lang ang niaging NAT kon dili apil nang uban pang mga pasulit sa Departamento sa Edukasyon (DepEd):

• Samtang selyado ang test papers gikan ulohang buhatan sa DepEd, wa nay magbantay sa mga superintendente, mga principal ug mga magtutudlo kon di ba nila lilion ang mga pangutana pila ka adlaw sa di pa ang pasulit;

• Kasagaran sa night high schools nga nahimutang sa bukirang mga barangay mas dagko og grado kay sa mga klase sa adlawan kay uwahi man ang ilang pasulit ug mas dako ang kahigayonan nga makadawat sila og leakage; ug

• Dako kaayo ang tentasyon sa mga tagduma sa mga tulonghaan sa pagpanikas kay ang mas dakong grado sa ilang mga tinun-an makatabang man pagpataas sa ilang performance rating.

* * *

Atol sa samang Kapamilya Media Forum sa DYAB Abante Bisaya ug Sky Cable nga gitambongan ni Young, ang kadagkoan sa DepEd nipasalig nga ligdong ang sangpotanan sa NAT karong tuiga:

• Mas dako ang grado sa mga tulonghaan sa bukirang mga barangay di lang sa Dakbayan sa Sugbo kon dili apil na sa ubang bahin sa nasud kay di daghan ang kiat ug kalingawan nga makalipat sa mga tinun-an ug mas makatingob ang mga magtutudlo sa ilang panahon pagmatuto sa mga bata kay kasagaran nila nagpuyo ra sa samang barangay;

• Di angay'ng maguol ang mga ginikanan sa Dakbayan sa Sugbo kay samtang nius-os ang ranggo sa Cebu City Division mas taas ang kuha sa ilang mga bata kon itandi sa nangaging katuigan; ug

• Kasagaran sa mga tulonghaan nga dagko og kuha nakapahimus sa maayong pagduma sa ligdong, kugihan ug maayong modisiplina nga mga opisyal.

* * *

Ang mga pangu sa Parents-Teachers-Community Association (PTCA) federation nga nakatambong sa sinemanang tapok sa kamatuoran sa SM City Cebu Entertainment Plaza niangkon nga ang pagkuwang sa mga ginikanan nakatampo sab sa pag-us-os sa kalidad sa edukasyon sa ilang mga anak:

• May mga ginikanan nga nagsalig nga libre ang publikong mga tulonghaan ug busa di mahinugon nga mangahagbong ug magbalikbalik ang ilang mga anak;

• May mga ginikanan sab nga ganahan untang motabang sa pag-eskuyla sa ilang mga anak apan di kahimo tungod sa labihang katimawa nga mahurot nang ilang panahon sa pagpangitag ipakaon sa mga sakop sa pamilya; ug

• May mga ginikanan sang nagtuo nga ila ra sa mga magtutudlo ang responsibilidad sa pagtudlo sa ilang mga bata ug busa ang kagamhanan, di sila, maoy angay'ng tulisukon kon masaag sila sa tarung nga agianan.

* * *

E-mail: leo_lastimosa@abs-cbn.com