Hugot ug angay?!

Ang Dios Miiingon

Pamalandong

Agosto 20, 2006: Ikakawhaan nga Domingo sulod sa tuig

Mga Pagbasa: Panultihon 9:1-6/Efeso 5:15-20/Juan 6:51-58

Niadtong college pa ko kanunay nakong madunggan ang gipamulong sa pari kong amigo: "Hugot ug angay!" Nga kasagaran iyang ipunting ni bisan kinsa nga kansang panglawas gigamhan sa kahimsog. Ginaingon nga ang sekreto: "Sleep well, eat nutritious foods, exercise regularly. Labina ning panahona karon nga kasagaran sa kinabuhi, kutloon lang sa kamatayon tungod sa mga nagkadaiyang balatian sa kalawasan. Dugang pa, daghang mga sakit nato nakuha sa mga pagkaong "junk" nga kadaghanan kanato ang mokaon ug mokisap. Husto gyud si Monsenyor Salvador. "Daghan ang namatay sa kutsara kaysa pistola!"

Ingon ini usab ang atong Espirituhanong kinabuhi, nagkinahanglan kita og hustong sustansiya. Ning paagiha, makaingon kita nga nagkinahanglan diay kita sa Buhing Pan nga walay lain kondili ang atong Ginoong Jesu-Cristo gyud mismo diha sa Sagrada Eyukaristiya.

Nahimong atong kalan-ong Espirituhanon ang atong Ginoong Jesus aron sa ingon mamahimo siyang kabahin sa atong pang-inadlaw nga pagkinabuhi maingon nga kita mamahimong kabahin usab sa iyang kinabuhi. Pinaagi sa pagkalawat sa iyang Lawas ug Dugo kita nahimong maanaa kaniya maingon nga siya maanaa kanato.

Kon siya mamahimong usa na kanato ug kita usa diha kaniya, nan, mas dali na lang alang kanato ang pag-awat sa mga mahinungdanong pagtulon-an nga gitudlo kanato sa atong manunubos sanglit, ang pagkalawat kaniya mao man pud ang kahigayonan nga kita gamhan sa pagpakaylap ingon sa angay sa mensahe sa kaangayan, kaayo ug kalinaw!