Ang poso ni Dong Ben

Ang Dios Miingon
Pamalandong
Agosto 13, 2006: Ikanapulog-siyam nga Domingo sulod sa tuig
Mga Pagbasa: 1 Mga Hari 19:4-8/Efeso 4:30-5, 2/Jn. 6:41-51

Adunay ko'y higala nga si Dong Ben. Ginaingon nga si Dong Ben dunay poso. Usa ka adlaw niana, nikaon si Dong Ben. Iyang gitunga ang poso. Ang katunga gihimong kan-on samtang ang laing tunga gihimong sud-an!

Sa kalisud ning atong panahon, maingon ana na lang tingali ang atong pagtan-aw sa maong reyalidad sa kagutom. Ang kagutom maoy nasinati sa kadaghanan kanato. Ang mga babag sama sa kakabus, kawalay pangita, ug kawalay edukasyon maoy nagtukmod sa uban kanato nga mosawom na lamang sa lim-aw sa kahugawan aron lamang mabuhi. Tungod kay buot kita og katagbawan, buot kita og kabusganan.

Nahimong kontrobersiya ang pag-angkon ni Jesus nga siya ang Pan sa Kinabuhi. Dakong butang nga nagkahulogan og lantugi sa iyang kapanahonan. Dili sila makatuo, ug labaw na nga hilasan sila sanglit ang imahen ni Jesus ordinaryo na lamang kaayo alang kanila nga naminaw.

Apan adunay mahinungdanong punto nga atong makuha gikan niini. Ug kini ang mahitungod sa atong dakong panginahanglan sa atong Ginoo. Nga diha sa atong mga pagpamuhat ug panlimbasog, nahimo siyang usa ka dakong kabahin niini. Nahimo siyang dakong kabahin kanato sa dihang siya nahimong tawo nga sama kanato, nga tungod niini, iyang nasinati ug iyang nakita ang atong mga panginahanglan. Mao kini ang kahulogan sa mystery of incarnation.

Balik sa poso ni Dong Ben. Ang maong ehemplo mao pud unta ang magtukmod kanato nga mopaambit sa mga gigutom ug mga nagkalisud. Kini tungod kay sama kanilang mga ihid kita usab adunay mga tinai ug mga tiyan nga gutomon ug mangandoy og katagbawan!