Kawat! kawat!

Kay midagsang na man pag-ayo karon ang pagpangawat, unya ang mga butang-kinawat sayon ra man kaayo nga ibaligya sa mga surplus dealers, atong pahinumdoman ang kapolisan sa tukma nila nga gimbuhaton.

Sa among panaghinabi ni "chief Toto," ang hepe sa mga barangay tanod sa barangay Lorega-San Miguel, abtik siya kaayo nga miingon nga basi sa gitug-an nako kaniya, sigurado siya nga wala kini himoa sa kapolisan.

Ang akong gipasabot mao ang mga lagda nga gilatid sa Presidential Decree 1612, kon Anti-Fencing law.

Dili ikalimod nga ang ubang butang nga gipangbaligya sa mga tawo diha sa mga surplus dealers, mga kinawat. Kini tungod kay daghan kanila dili makapresentar og kamatuoran nga sila ang tag-iya niini, sama sa resibo pagpalit.

Ubos sa balaod, ang maong mga butang mahimo gihapon nga paliton sa tagdumala og surplus stores, apan gidid-an sila sa pagbaligya dayon niini sulod sa gilatid nga gidugayon.

Kinahanglan nga ang mga tagdumala sa mga surplus stores mohimo og lista sa mga butang nga ilang napalit nga walay resibo kon kadudahan ang tag-iya unya isumiter nila kini ngadto sa kapolisan.

Ang laing mga kopya niini ilang ipublikar kon ibutang sa mga public places sama sa mga munisipyo, barangay hall ug labing maayo kon ila gyod nga imantala sa mga newspapers.

Ang tumong niini mao nga ang mga tag-iya niadtong mga butang nga kinawat masayod ug posible pa nilang makuha ang maong mga kagamitan.

Ang pangutana, unsay mahitabo sa gibayad sa surplus dealers kon kinawat ang maong mga butang nga ilang napalit?

Ang tubag niining maong pangutana mao nga kon mamalit gani kamo og mga butang nga walay klaro ang gigikanan, siguroa nga mailhan ninyo kon kinsa ang mga tawo nga nagbaligya kaninyo sa mga butang.

* * *

Karon ari ta sa gimbuhaton sa mga polis. Ang mga polis, ilabi na kadtong mga nadistino sa Theft and Robbery Section, kinahanglan nga mohimo g'yod og kanunay'ng pakisusi sa mga surplus dealers kon gituman ba nila ang lagda.

Ang maong mga polis dunay visitorial power nga makahimo pag-inspection sa maong mga baligyaanan og mga segunda-mano nga butang. Si "chief Toto" miingon nga wala g'yod kini himoa.

Bitaw, ang tinuod nagpareho lang ang mga tagdumala og mga surplus stores ingon man ang kapolisan nga wala makatuman sa lagda nga gilatid sa Anti-Fencing law.

Awhagon nato ang kadagkoan sa kapolisan nga mandoi ninyo ang mga sakop sa TRS nga tumanon nila ang mga lagda nga gitahas kanila sa Presidential Decree 1612.

Kini ra bang TRS sa dakbayan sa Sugbo, wala g'yod koy bilib sa paghimo og follow-up. Hingpit g'yod nga nawagtang ang P5,000 nga kwarta sa akong paryente nga gikuot diha sa Manalili ug bisan gi-report namo sa TRS, wala g'yod masulbad.

* * *

Apil sa gihisgotan namo ni Chief Toto, mao ang kabahin sa mga batan-on nga midagsang pag-ayo karon panahon sa kagabhion. Giangkon sa mga tanod nga mitapol na sila sa pagpanakop aning maong mga menor de-edad nga nakalapas sa curfew ordinance.