Botika angayang gukdon sa PDEA

Dul-an na sa duha ka tuig human madiskobrehi ang operasyon sa laboratoryo sa shabu diha sa dakbayan sa Mandaue diin sagad sa mga chemicals nga gigamit sa operasyon giingong didto palita sa Far Eastern Drugs apan hangtud karon gikatolgan sa Philippine Drug Enforcement Agency ang ilang imbistigasyon batok sa drug store ug sa mga local contacts sa giingong financier nga si Calvin Tan.

Atol sa pagpadayon sa husay sa kaso kagahapon ang usa sa mga sakop sa PDEA nga lakip sa operasyon niadtong Septiyembre 2004 admitido nga nagkinahanglan og pagtugot gikan sa ilang buhatan ang Far Eastern Drugs aron makabaligya sa mga chemicals sama sa acetone nga usa sa mga ingredients sa paghimo og shabu.

Apan bisan pa sa kakuwang og permit sa maong drug store hangtud karon wa pay aksiyon ang PDEA batok sa mga tag-iya ug tagdumala niini. Si Supt. Adzhar Albani atol sa iyang cross-examination kagahapon miingon nga ilang gitugyan ngadto sa ilang regulatory ug compliance division ang pagsusi sa posibling kalapasan sa drug store nga nag-supply og acetone sa laboratoryo sa shabu.

Si Albani miingon nga ang Far Eastern Drugs maoy supplier sa laboratoryo sa acetone kini basi sa ilang gihimong surveillance. Si Albani miingon nga moabot sa 95 ka container sa acetone ang kinatibuk-ang napalit sa mga nag-operate sa laboratoryo gikan sa maong botika.

Admitido hinuon si Albani nga wa siyang kakita sa ubang mga chemicals sama sa pseudoephedrine ug ephedrine nga maoy main ingredients sa paghimo og shabu didto sa maong botika. Apan bisan pa niini ang pagbaligya sa botika og acetone nga way klarong pagtugot gikan sa PDEA usa ka kalapasan nga angayang di palampason sa mga opisyal sa PDEA.

Unsa may gihimo sa PDEA batok sa tag-iya sa botika? Nganong hangtud karon wa pay kaso nga napasaka batok nila? Nagpasabot ba nga nahalin nang mga opisyal sa PDEA hinungdan sa ilang pagpakahilom sa posibleng tulobagon sa mga tag-iya sa botika?

* * *

Kon nagtuo ang mga nagtinguha paglangyaw sa gawas sa nasud aron sa pagpanarbaho nga langit ang kinabuhing nagpaabot nila, nasayop sila.

Kon duna may giswerte sa ilang paglangyaw, maihap lang siguro sa tudlo, kasagaran kon wa mailad sa mga recruiter nabiktima sa pagpanglupig ug panaogdaog sa ilang mga agawon.

Usa sa mga gidimalas mao si Darren Legaspi nga nabiktima sa grabing pagpanaogdaog sa iyang agawong Lebanese. Si Legaspi nakaagawon og adunahang Lebanese, gani nagtrabaho siya sa usa ka mansion nga pinuy-anan sa iyang agawon.

Apan kon unsa ka dako ang panimay nga iyang gitrabahoan dakong baliktad ang kwartong gipapuy-an niya. Si Legaspi mitug-an nga didto siya iipon sa iyang amo sa higdaanan sa mga iro diin maoy iyang tupad sa pagkatulog uban ang bao.

Di pa igo, mas nindot pa og pagkaon ang iro kon itandi niya nga maoy nagsunod sa salin nga pagkaon. Gikinabaw sab siya pagtratar sa iyang mga agawon nga mipatrabaho niya sugod sa kadlawon hangtud sa tunga'ng gabii aron iyang makuha ang iyang sweldo nga 150 dolyares matag buwan kon moabot lang sa P8 mil matag buwan.

Busa, alang sa mga nagtinguha pag-abroad hunahunaa og maayo kon inyo pa bang ipadayon ang inyong plano sa paglangyaw.

* * *

[email protected]