Talisay nagkina-hanglan bag Cebu City councilor?

Mao ni ang isyo karon sa dakbayan sa Talisay, tapus matataw nga usa ka konsehal sa Cebu City naglaraw pag-challenge ni Mayor Soc Fernandez niining umaabot eleksiyon sunod tuig.

Si Mayor Soc namahayag nga wa’a siya mahadlok niining maong hagit, kay alang niya, he did his best ug ang katawhan nay mohukom sa iyang performance. Gawas pa, matud niya, misalig siya sa intelligence sa taga-Talisay isip mabuot nga mga lungsuranon ug discerning nga mga botante.

Usa ka taga-Talisay,akong gikahinabi, namahayag nga ang isyo alang kanila mao ang performance. Unsa karon ang Talisay ubos sa pamunoan ni Mayor Soc? Nagmauswagon ba? Ug kon wa’a, gikinahanglan ba ang usa ka konsehal sa Cebu City aron magmauswagon?

Kon wa’a sila matagbaw sa performance ni Mayor Soc, wa’a bay laing taga-Talisay nga makapuli niya? Gikinahanglan ba gyud ang usa ka Cebu city councilor? Kinahanglan bang mag-import og personality aron ipuli kang Mayor Soc?

Ug luyo niining tanan, maoy nakita sa taga-Talisay ang panagsangka sa mga dagkung ngan sa politika, ang kang Gullas ug kang Tomas. Alang nila, ang pangutana mao: Nagkinahanglan ba sila sa liderato ni Tomas Osmeña nga maoy manghawod sa Talisay aron ang ilang dakbayan magmauswagon?

Mao kana ang tinuod nga isyo. Gullas vs. Tomas. Ug ang makatubag niining tanan, mao da ang taga-Talisay mismo. Sa ato pa, performance ni EddieGul batok sa mga damgo ug obsession ni Tomas.

Mao ni ang gisaligan ni Mayor Soc. Alang niya, mabuot ang taga-Talisay ug nasayod sa ilang perforamance.

Maoy atong panghinaut dinhi nga unta, dili na maoy atong basihan ang gidaghanon sa kwarta nga ipabaha matag eleksiyon, kon si kinsa ang atong botohan. Hinaut nga niining atong kahimtang karon, ato nang nakita kon unsay epekto sa kanunay natong pagsalig sa kwarta matag eleksiyon.

Di lang sa dakbayan sa Talisay, kondili, sa tibuok nasud, hinaut nga na-leksiyon na kitang mga Pinoy sa dautang linugdangan sa paghimog negosyo sa balaan unta nga election. Komentaryo? Text 0916-6484650.