Ombudsman pakauwaw

Kon madutlan pa sa uwaw, angay’ng manlipaghong ang mga dagway sa kadagkoan sa Visayas Ombudsman. Kay sa makausa pa nabisto sa kadaghanan nga di sila maoy labing kasaligan nga dangpanan sa mga nagduda og kahiwian sa mga transaksiyon sa nagkalainlaing mga ahensiya sa kagamhanan. Ang akong gipasabot mao ang ilang pagyaka sa kaso ni Heneral Adelberto Yap, ang kanhi general manager sa Mactan-Cebu International Airport (MCIAA).

Ang Ombudsman maoy unang gidangpan sa mga kawani ug mga kontraktor sa MCIAA nga nikuwestiyon sa mga transaksiyon nga gisudlan ni Yap. Bisan ang Civil Service Commission (CSC) nagpalaban sa Ombudsman dihang gibungulbungolan lang ni Yap ug sa iyang mga alyado sa MCIAA Board ang ilang kamandoan pagpalagpot ni Yap sa katungdanan kay wa siyay civil service eligibility. Apan samtang nanghuy-ab pang Ombudsman, ang MCIAA board maoy nakakita sa panginahanglan pagsuspenso ni Yap aron pagpanalipod sa kaligdong sa imbestigasyon sa mga pasangil batok niya.

* * *

Ambot tungod ba kay nakublan na sa kadaghan sa mga kaso nga nagbaha matag adlaw sa ilang buhatan, o natakdan na ba sa pipila ka mga opisyal nga gipasanginlang gipadangogan og multicabs ug ubang suburno pagluto sa mga kaso, ang mga imbestigador sa Ombudsman, gawas lang sa pipila nga matag karon ug unya mopahinumdom nato nga di pa silang tanan ang nakalimot sa ilang mga gimbuhaton, mora nang mantika nga nagbagtok nga kinahanglan pang daoban sa sibaw nga pamukaw una manglihok.

Samtang sige silang pagarpar nga naibanan nang nagtipun-og nga mga kaso nga nag-ung-ong sa ilang buhatan sud na sa daghang katuigan, ang katawhan inanay nang nawad-an og pagsalig sa ilang kaisog ug kamatinud-anon paggukod sa mga nagpahimus ug nagpaburot pinaagi sa paghimong gatasan sa ilang mga buhatan. Wa katabang sa ilang kawsa ang pabaga nga pagyaka sa ilang pangu, si Ombudsman Merceditas Gutierrez, sa mga kamandoan sa Korte Suprema paggukod sa mga suod ni Pres. Arroyo ug First Gentleman Mike Arroyo nga gilambigit sa multi-milyones pesos nga mga anomaliya.

* * *

Sa kaso ni Yap, kasaligang mga tinubdan nipahibawo namo nga wa hingpit nga naghagok ang lokal nga mga imbestigador sa Ombudsman. Gani, nahibaw-an ni CSC 7 Director David Cabanag Jr. nga ang Ombudsman nangayo og mga dokumento sa PLDT pagmatuod nga ang telepono gyod sa buhatan ni Yap sa MCIAA maoy tinubdan sa faxed copy sa gidoktoran nga charter sa MCIAA nga nakailad sa nasudnong liderato sa CSC.

Laing tinubdan nagbutyag nga duna nay rekomendasyon ang usa sa graft investigators pagpahimutang ni Yap ubos sa preventive suspension hangtod nga matiwas ang mga imbestigasyon sa daghang mga pasangil batok niya. Apan sa lisod masabtan nga mga hinungdan, ang MCIAA board mao na man hinuoy nakauna pagsusi sa nabistong mga eskandalo. Nga mao untay gimbuhaton sa Ombudsman, kon luwas pa lang unta sila sa nagkonsabong katapolan, katalawan ug mga padangog.

* * *

Email: [email protected]