Sugal sa Iba-an

Ang sugal mikaylap na karon sa lainlaing dapit. Angay hingusgan ang pagbadlong sa bisan unsang sugal ilabi na gayod kon kini wala itugot sa balaod. Kana bang illegal gambling.

Usa ka magbabasa niining lindog mi-text nga nagkanayon: "Good day, Sir. Daghang sugal diri sa Iba-an, Univille, Banilad. Thanks. -- 0921-4561558 (July 1, 2006 -- 15:07:17).

Maayong himoan og pakisusi aron masuta kon unsa ka tinuod kining maong sumbong. Akong awhagon ang mga barangay officials sa barangay diin nahisakop ang Iba-an nga subayon ninyo kon tinuod ba ang sumbong nga midangat dinhi sa Modus nga daghang sugal diha sa nasangpit nga dapit.

Ang mga opisyal sa barangay maoy mas daling masayod sa kahimtang sa ilang dapit tungod kay sila ang mas nasuheto. Mao nga manghinaot kita nga magkugi ang mga barangay officials sa pagsusi mahitungod niining maong sumbong.

* * *

Sa laing bahin: "Nakahibawo ko kon asang dapita kanang mangilad pinaagi sa bato nga tapol. Naa kana sa skywalk unahan og diyotay sa UC. Usa ko sa nailad nila. Ang ilhanan nianang namaligya og bato nga tapol, kanang naay bitin nga imagic-magic kunohay. Thank you." -- 0910-3687234 (July 4, 2006 -- 17:11:59)

Bantayanan bitaw kaayo kining mga mangingilad nga mamaligya kunohay og bato nga tapol. Daghan na ang misumbong kanako nga nabiktima sila niining maong estilo sa tinonto. Hayloon nila ang ilang prospek nga ipanghatag lang ang maong mga bato pero pag-angdo pa kay pabayran man diay.

Mao nga angay magbantay ang atong kaigsuonan mahitungod niining maong tinonto. Ang labing maayong buhaton mao nga dili gayod modawat bisan unsay ipanghatag sa maong mga tawo. Pinaagi niini, dili sila makapugos sa pagpangayo og kuwarta gikan kaninyo. Dili mosalir ang ilang tinonto.

Gawas sa dapit nga gitumbok sa atong texter, posible pod nga adunay naghimo niining maong modus operandi sa ubang mga dapit sa siyudad. Pagbantay!

(Sumbong ug reklamo? Text sa 0910-8105522)