KBP accreditation

Angay'ng pamatud-an g'yod ni magsisibya Joash Dignos ang iyang pamasangil nga si Mayor Thadeo Ouano "midsyer-dsyer" (jer-jer) sa iyang umagad.

Ang umagad ni Mayor Ouano nga si Cheryl mipasaka og kaso nga libel batok sa magsisibya kay iyang nasabtan nga siya g'yod ang gipasabot nga nakig-jer-jer sa iyang ugangan.

Matud ni manlalaban Gloria Lastimosa-Dalawampu nga sa programa ni Dignos kaniadtong Hulyo 14, makadaghan nga higayon nga giluwatan sa magsisibya ang pamahayag "Opisyal nga mi-ger-ger ug umagad, mata na!"

Wala tuod niya ilha sa maong adlaw nga si Thadeo maoy iyang gipasabot sa giingon niyang opisyal nga mi-jer-jer og umagad.

Apan sa pagka Hulyo 17, masabtan na kay miingon siya, "Thadeo, di g'yod ka momata diha? Unsa man, nagtinambaloslos ka diha Thadeo Ouano? Ikaw kaning gikaingon nga chief executive nga ni-jer-jer og umagad."

Ako personal, wala g'yod makaila niining Dignos. Nagsugod ko pagka broadcaster kaniadtong 1984, apan wala g'yod kami magkatagbo niining Dignos.

Ang mga kaso nga libel nga gipasaka batok kaniya, magsilbi diay nga sinugatan kay nahibaw-an nako nga kini si Dignos, bag-o pa diay nga nadistino dinhi sa Sugbo gikan sa Mindanao.

Ang matag tawo dunay iya-iyang paagi paghimo'g komentaryo apan kay ania man kita sa "airlanes" kinahanglan nga ang atong mga lihok ipasubay nato sa mga lagda nga gilatid sa Kapisanan ng mga Brodkaster ng Pilipinas.

Buyno, angay'ng pamatud-an ni Dignos ang iyang pamahayag. Bisan og ang termino nga iyang gigamit mao ang "jer-jer" apan kining pulonga naandan na nga maoy gigamit nga kahulogan sa sexual intercourse.

Pareho ra god na adtong taga Manila nga nag-abang og usa ka kwarto diha sa D. Jakosalem nga nasuko kay ang nag-abang sa silong pwerteng sabaa kuno.

Gisinggitan sa mga Tagalog ang mga nagpuyo sa silong. "Hoy! Ang ingay-ingay ninyo mga Bisaya! Isipin nyo naman may umu-upa dito sa taas!

Abi ninyo og unsay tubag sa mga Bisaya nga nagpuyo sa silong? Gisinggitan ang mga Tagalog sa taas. "Pag-upa mo'g inyo diha, kay mag-jer-jer pud mi'g amo diri." He! He!

Ang pagkomentaryo usa ka maayong paagi aron pagtul-id sa mga hiwi nga binuhatan sa atong mga opisyal, apan kon magpinataka kita paghimo'g komentaryo nga walay basihanan, peligro.

Aw, daghang mga brodkaster ang dili mahadlok kay ang pyansa god sa kasong libel pwerte ra mang gamaya, P10,000 ra man.

Sa akong bahin, daygon nako ang mga sakop sa media nga dili mahadlok apan dili maayo nga moluwat kita og pamahayag nga walay basihanan, ilabi na kon dili ka accredited sa KBP.

* * *

Usa ka lumad nga taga Kinatarcan, lungsod sa Sta. Fe, sakop sa Bantayan Islands, miawhag nga unta may doctor g'yod sa kagamhanan nga idistino sa ilang dapit. Gawas sa doctor, tambal sab.

Husto man usab ang awhag ni Marilyn "Neng-neng" Guiduquio kay tungod sa kalayo sa ilang isla, maglisud sila pagtabok ngadto sa mainland kon manginahanglan og pag-atiman sa ilang panglawas.

Nakasabot ko sa kahimtang sa mga taga Isla, dili ra kay sa Kinatarcan kon dili apil na sa ubang mga dapit nga walay mga government doctor nga gidistino.

Sa Kinatarcan, ang mga masakiton nila kinahanglang dad-on pa sa Daanbantayan aron mahiling sa doctor. Apan kon dagko ang bawod, dili sila makatabok.

Misamot ang tinguha ni ginang Guduquio pagkasayod niya nga daghang mga tambal ang nangahupas lang nga wala kapahimusli. Tinuod, sa tibuok nasud, dul-an sa P30 milyones nga kantidad sa tambal nahupas lang.