Apan unsa ba gayud ang tinud-anay nga estado sa nasud? Wala na ta magkinahanglan og presidente nga maoy mosaysay alang sa tinud-anay nga estado sa nasud tungod kay sa atong palibot palang daan, ato na nga makita ang tinouray nga kahitang sa nasud.
Hinungdan nga dili mahimong mabasol ang mga tawo kung ila lang gipalapos sa pikas dunggan ang mga positibong balita nga giluwatan sa presidente kahapong adlawa.
Ang tinouray nga kahimtang sa ekonomiya anaa sa matag usa kanato. Ang tinuoray nga sitwasyon sa ekonomiya anaa sa mga makililimos sa kadalanan, sa mga tawo nga padayong namunit ug nagpatimbang og basura. Ang nawong sa ekonomiya sa Pilipinas anaa sa mga mamumuo nga padayong nagdawatan og mubo nga suholan gikan sa ilang mga hakog nga amo. Anaa sa mga drayber sa taxi ug dyip nga padayong nagbagolbol tungod sa way hunong nga pagsaka sa presyo sa lana.
Dili nalang ta mopalayo tungod kay mismo sa imong pamilya, imong maobserbahan kung aduna bay maayong kausabang nahitabo ubos ning maong administrasyon. Kung kaniadto sayon ra ang pagpatungha sa imong mga anak, karon sayon ra ba sab alang sa imong mga anak ang pagpatungha sa ilang mga anak?
Kung kaniadto nakahatag ka sa mga batakang panginahanglan sa imong mga anak, ang pangutana, nakahatag ba sa susamang mga butang ang imong mga anak karon ngadto sa ilang mga anak? Kung kaniadto hinanok ka nga makatu'g ug way gikabalak-an sa siguridad sa imong pamilya, karon, imo bang nabati ang susamang siguridad o mas naputos ka sa kabalaka nga basin may dautang nahitabo sa imong anak nga nadugay pagpauli?
Ang SONA sa presidente gihimo aron sa pagsunod sa unsay naandan. Ang iyang pagbatbat atubangan sa hiniusang kongreso ug mga opisyal sa gobiyerno, maoy sinyales sa pagbukas sa bag-ong hugna kongreso. Apan kung tan-awon ang unod sa mga pamahayag sa presidente, nakatag-an ka, puno ug makalipay paminawon. Apan bisag unsaon pa nimo og bali-bali, wala pa kini mabati sa kinabag-an sa katawhan.
Husto ka sa imong opinyon nga ang administrasyon nagmalampuson sa daghang mga butang sama sa pagpahilom sa mga tawo nga nisaway sa iyang pamunoan, sa matud pa pagpahunong sa imbestigasyon sa giingong pagpanikas sa miaging eleksyon ug sa giingong pagtago sa mga tawo nga adunay papel sa giingong pagpangurakot sa administrasyon.
Apan dili sa tanang higayon nga pulos nalang pagsaway ang mahimo sa usa ka Pinoy batok sa administrasyong Arroyo. Saludo ko sa pagpadayong paghupot ni Presidente Arroyo sa katungdanan bisan pa sa daghang hulga nga niabot sa iyang pamunoan gikan sa Oakwood Mutiny hangtud na sa "stand-off" sa mga Marines. Nakadayeg ko sa mga lakang sa presidente sa paghupot sa katungdanan luyo sa mga pagsaway tungod kay alang niya wala nay mas angayan pang mangulo sa nasud.
Nakadayeg ko sa paghatag sa administrasyon ug igong pagtagad sa mga gitawag nga "unsung heroes" nga OFW didto sa Lebanon nga kung kanus-a niturok ang grabe nilang kalisang tungod sa sunodsunod nga pagpamomba, mao pay pagluwas kanila sa gobyerno. Nakadayeg ko sa way sukod nga mga panaad ug damgo sa administrasyon alang sa katawhang Pilipinhon. Sama nimo, nagpaabot ko sa adlaw nga dili lang ang presidente ang mosaysay sa kahimtang sa nasud, apan ang katawhan na mismo.