Way pagkaluya

Nagbaha ang nagpakabana nga senior citizens sa Sugbo pagtambong sa Kapamilya Media Forum sa SM City Entertainment Plaza nga nagtuki sa mga balaod nga nanalipod ug nagpatigbabaw sa ilang mga katungod. Ang pagtunga sa tanang mga dinapit aron pag-atubang ug pagpasabot nila nakapapas sa tanan nakong pagduda nga ang ilang hut-ong maoy labing hinog ug busa maoy labing gamhanang moduso sa ilang kawsa.

Apil sa mga nanambong ang inilang mga haligi sa Sugbo nga pila pa lang ka tuig ang nilabay takos kaayong nagduma sa ilang mga ahensiya sa kagamhanan o pribadong mga kompaniya. Karong nang-retiro na sa serbisyo, ang ilang kakugi ug liderato maoy motino nga ang ilang pakigbisog di maluya ug labaw nang di mamatay ni makalimtan.

* * *

Ang duha ka kongresista sa Dakbayan sa Sugbo, Antonio Cuenco ug Raul del Mar, nipahibawo nila sa daghang balaodnon sa House of Representatives ug sa Senado nga pulos gitumong sa pagpalapad pa sa ilang mga benepisyo. Nag-una ang balaodnon ni del Mar nga nagtinguha pagpalambo sa pension sa retirees. Gituki sang Cuenco ang ubang mga balaodnon nga nakapalipay pag-ayo sa nanambong nga senior citizens:

• Pagpadako pa sa ilang diskuwento sa tambal, transportasyon ug mga kan-anan gikan sa 20% ngadto na sa 30% o 40%;

• Paghatag nila og diskuwento sa pre-need policies sa gasto sa pagkamatay ug paglubong; ug

• Pagpalapad pa sa ilang mga diskuwento ngadto na sa mga bayranan sa kuryente, tubig, telepono ug bisan sa halin kaayong phone cards.

Niangkon hinuon silang Cuenco ug del Mar sa media forum nga gisibya sa DYAB Abante Bisaya ug Sky Cable nga samtang angay nang ikalipay ang pagpatuman sa pipila ka mga benepisyo kinahanglan pang tapakan ang mga buslot alang sa mas epektibong pagpatuman.

* * *

Ang kaabunda sa mga balaodnon wa magpasabot nga haruhay nang kahimtang sa senior citizens. Gikahadlokan nila nga bisan mapasar pang bag-ong mga sugyot nga gitun-an sa mga kongresista ug mga senador, mahisama lang gihapon sa nag-unang mga balaod nga gikaluhaan og nagbuntaog nga kalapasan. Kinahanglan pa silang makig-away una mahatagan sa mga benepisyo. Sa kasagarang mga kaso, bisan makig-away pa, maglaway lang gihapon sila sa mga katungod nga gitugyan na unta nila sa balaod.

Usa sa labing gireklamohan sa senior citizens mao ang pagdumili sa mga botika sa paghatag nila sa 20% sa presyo sa mga tambal-nga tungod sa kahinog na sa ilang pangedaron maoy labing dako nilang panginahanglan sunod sa pagkaon. Ang mga botika nireklamo nga alkanse kay gitakda sa bag-ong balaod ang "tax reduction" inay sa ilang gipangayo nga "tax credit." Apan si Vic Sapio, ang pangu sa senior citizens sa Consolacion, kinsa beterano sa negosyo sa tambal, niinsistir nga ang mga botika igo lang nahinugon sa alkanse sa ilang ginansiya.

* * *

E-mail: [email protected]