Peke nga salapi

Usa sa angay gayod natong bantayan karong panahona mao kining peke nga salapi. Delikado kaayo kon mabiktima kita niini. Kon kitay makadawat sa maong kuwarta, luoy kaayo ta. Samot na kon dili nato madiskubrehan nga peke nga salapi diay ang atong nadawat. Sa higayon nga ato kining ibayad sa produkto nga atong paliton ug madiskubrehan nga mini kini, kita ang posibleng dakpon. Mao nga kinahanglan gayod nga magbantay kita sa pagkaylap sa mini nga kuwarta.

Usa ka magbabasa niining ubos kong lindog mi-text nga nagkanayon: "Good day, Mr. Vallecera. Pahimangnoan nato ang atong kaigsuonan bahin sa mga peke nga salapi. Usa ko sa nabiktima niini. Ang ilang modus mao ni: Duha ni sila ka tawo. Babaye ang usa. Maoy biktimahon ang mga tindahan. Magsakay sila og motorsiklo. Iatol nila nga busy na kaayo. Mokanaog ang babayeng guwapa. Maoy mopalit sa tindahan. Kon masuklian na, tulin pa sa manatad nga mosibat. Peke diay ang ilang kuwarta. Salamat." -- 0926-2158344

Klaro kaayo ang detalye sa maong text mao nga dili na kinahanglang ipatin-aw pa nato kini. Pagbantay kamo niining maong matang sa modus operandi ilabi na gayod kadtong mga tag-iya og tindahan nga maoy sagad ig-on niining maong mga suspek. Kinahanglan nga magmaigmaton usab kita aron dili kita mabiktima sa tinonto sa mga badlongon sa katilingban.

Subling mipadangat og reklamo dinhi sa akong lindog ang mga driver og PUJ nga kanunay mabiktima sa mga dispatser diha sa eskina sa Osmeña Boulevard ug P. del Rosario. Sagad sa mireklamo mao ang mga PUJ nga magbiyahean paingon sa Capitol. Magplantalyag dala og newspaper kining maong dispatser aron ingnong newsboy.

Padayon sab nga gireklamo ang dispatser nga anaa diha sa eskina sa Manalili ug Osmeña Boulevard. Kursonada kaayo kining maong dispatser tungod kay bisan may taga CITOM o mga polis nga magbantay dili layo sa maong dapit apan walay kurat siyang mipatuman sa iyang modus operandi. Matud pa sa mga PUJ driver nga nahasol na silag maayo niining maong dispatser.

(Sumbong ug reklamo? Text sa 0910-8105522)