Tipsheets yawe sa kasulbaran sa masiao

Giinsister sa mga opisyal sa kapolisan dinhi sa dakbayan nga minus na ang illegal nga sugal nga masiao kini bisan pa sa padayong pagkatap sa mga masiao tipsheets ug sa dayag nga pagpangisyu og numero sa mga ushers.

Si Supt. Pablo Labra II ang pangulo sa Criminal Investigation and Intelligence Bureau miingon nga singko porsyento nalang ang operasyon sa masiao dinhi sa Sugbo kon itandi niadtong dekada 90. Hinuon miingon si Labra nga di siyang kasiguro kon mao ba sab ni ang sitwasyon sa ubang bahin sa lalawigan sa Sugbo tungod kay duna silay report nga namalhin na ang mga masiao operators didto sa kalungsoran.

Apan usa ka miangkong kanhi financier sa masiao didto sa Bogo mitug-an sa tulomanong Lintunganay sa DYLA kagahapon nga wa gyud mohinay ang masiao. Gani matud niya nga di sab tinuod ang pangangkon ni boxing promoter Rex "wakee" Salud nga nihunong na siya sa maong illegal nga negosyo.

Ang maong financier miingon nga sayon rang patyon ang maong illegal nga sugal nga wa kinahanglana nga rondahon sa kapolisan ug pangitaon kung kinsa ang mga financier niini. Bugtong buhaton sa kapolisan mao ang pagbantay lang sa mga printing press nga responsabli pagpanghimo og tipsheets ug maoy ilang dakpon.

Matud sa kanhi financier nga kon dakopon sa kapolisan ang mga tipsheets ug dili na tugotan nga mokatap seguradong mahanaw ang masiao. Ang padayon nga pagkatap sa mga tipsheets nga nagpakita sab sa resulta kuno sa duwa maoy nakaingganyo sa mga tawo nga mopusta bisan kon kini klarong ilad.

Kon di na makakita og resulta ingon man tipsheets ang mga tawo seguradong di na sila mopusta sa masiao. Pero ang nakapait kay gipasagdan man sa atong kapolisan ang padayon nga pagkuyanap sa tipsheets.

Human mogawas sa nasudnong telebisyon ang padayong operasyon sa masiao sa Sugbo, ang hepe sa kapolisan dinhi sa rehiyon, C/Supt. Silverio Alarcio, Jr., miingon nga iyang hugtan pagpatuman ang one-strike policy.

Kini nagpasabot nga kadtong mga hepe sa kapolisan nga masakpan nga dunay operasyon sa masiao sa iyang area pinaagi sa operasyon sa laing unit sa kapolisan gawas sa iyang area mag-atubang siya og imbistigasyon gawas sa paghulip niya sa pwesto.

Matud ni Alarcio nga iyang tigumon ang iyang mga hepe sa intelligence ug operations atol unya sa iyang pagbalik gikan sa kaulohan aron hisgutan ang maong problema. Si Kongresista Antonio Cuenco mipasalig na sab nga iyang awhagon si Mayor Tomas Osmeña paghatag og prioridad sa kampanya batok sa masiao.

Si Cuenco miingon nga wa hatagi og prioridad sa kapolisan ug sa lokal nga mga opisyal ang kampanya sa illegal nga sugal hinungdan nga padayon kining mikuyanap. Ang kapakyas pagsanta sa kapolisan sa masiao wa hinuon magpasabot nga nakadawat sila og suborno gikan sa mga masiao operators.

Apan ang kanhi financier nga nahinabi sa DYLA miingon nga standard operating procedure nila nga mga financiers ang paghatag og payola sa kapolisan ug sa mga opisyal aron di samokon ang ilang operasyon. Wa hinuon siya mohingan kon kinsa ang mga nagdawat niya kaniadto og suborno, apan matud niya apil ni sa budget nila matag buwan samtang ang uban matag semana.

Kon dunay budget ang mga financier alang sa suborno sa kapolisan ug sa ubang mga opisyal, nahibawo na ta og nganong hangtud karon wa gyud masulbad ang masiao; kon nganong bisan sa dayag nga operasyon niini way nahimo ang kapolisan ug kon unsay hinungdan nganong miinsister ang kapolisan nga minus na ang masiao bisan pa sa kamatuoran nga ang pagpangisyu og numero sa mga ushers daw sama sa pagpamaligya og isda diha sa merkado.

* * *

[email protected]