Hilanat ni Pacman

Sukwahi sa gipaabot sa kadaghanan, si Oscar Larios ang nidominar ni Manny Pacquiao sa unang tulo ka hugna sa ilang sangka. Ang makapalumos nga arangkada sa mga kumo nga maoy naandan ni Pacquiao matag sugod sa iyang mga sangka wa igkita. Si Larios na man hinuoy sayo nga nakabuylo.

Puwerteng kuyawa ni Freddie Roach, trainer ni Pacquiao, dihang ang left hook ni Larios nakapabarag ni Pacquiao sa pisi ug diriyot gyod siya malup-og sa pagsugod sa ikatulong hugna. Apan sama sa iyang pagdawat sa mas bangis nga santako gikan nilang Erik Morales ug sa ubang mas kusgan niyang mga kaatbang, gipamatud-an ni Pacquiao ang iyang kalig-on pinaagi sa pagpaksit sa ibabaw sa walang mata ni Larios sa samang hugna ug pagdominar sa nahibiling mga hugna sa sangka.

* * *

Niangkon si Roach nga puwerteng dugaya nga nakapanukad ni Pacquiao. Matod niya sa ikaunom nga hugna, kanus-a iyang gipadak-an ang samad sa mata ni Larios, na nagsugod si Pacquiao pagdominar sa sangka. Nauyog sa makabungog nga suliyaw ug pagakpak sa iyang kataginasud sud sa Araneta Coliseum, diin nagbinukbokay silang Muhammad Ali ug Joe Frazier sa orihinal nga "Thrilla In Manila" 31 ka tuig nang nilabay, dihang si Pacquiao nipaluhod ni Larios sa ikapitong hugna ug dihang ang nag-asu-aso niyang mga kumo nakapahagba ni Larios sa ikaduhang higayon pila ka gutling na lay nahibilin sa 12 ka hugna nga sangka.

Napamatud-an ni Pacquiao nga way sukaranan ang mga kabalaka nga ang kadaghan niyang endorsements ug mga raket nakaiban sa iyang kaandam, nakapahabol sa iyang katakos ug nakahulga sa iyang lahutay. Ang 29 anyos nga si Larios maoy klarong naluya sa bangis nga kulata nga iyang nahiagoman sugod sa ikaunom nga hugna.

* * *

Bisan sa makapakugang nga katakos nga gipakita ni Larios, nga nakamatuod nga di suwerte lay puhonan sa malampuson niyang pagpanalipod sa makadaghang higayon sa iyang pagka kampeyon sa tibuok kalibotan, di na makig-rematch si Pacquiao niya. May sukaranan ang pangambog sa mga turutot ni Pacquiao nga pila ka adlaw sa wa pang sangka mas nahasol si Pacquiao sa kahinay sa halin sa tiket kay sa mga kumo ni Larios.

Samtang makabali og gusok ang kakusog sa kumo ni Larios, ang kahinay sa iyang lihok ug ang dakong buslot sa iyang depensa nakahimo niyang way dag-anan bisan kapila pa sila magharung. Ug nakita bisan sa mga sugarol sa Guadalupe kinsa nangreklamo nga sa adlaw sa sangka wa nay nanawat parang Larios bisan og tinunga na lang ang pustaanay.

Maong ang tinuod nga hilanat ni Pacquiao mao pa lay pagsugod. Kay naglantaw na sang daan ang katawhan sa umaabot nga mas kulba-hinam, mas kuyaw ug mas lisod niyang pakigbangga sa ikatulong higayon sa mas andam nang El Terrible sa Nobyembre.

* * *

Email: [email protected]