EDITORYAL — Balaod pabor sa menor de edad

Aduna nay bag-ong balaod nga miprotehir sa katungod sa mga menor de edad nga suspek sa krimen.

Istrikto kaayo ang mga lagda sa maong balaod. Ug kun kini matuman sa mga hingtungdang ahensiya sa gobiyerno, walay duhaduha nga kaprotehian gyud ang mga menor de edad.

Apan duna ba kahay katumanan kining maong balaod sa dili madugay?

Usa ka probisyon sa maong balaod -- nga gitawag og Juvenile Justice and Welfare Act of 2006 -- mao nga ang usa ka juvenile offender nga nagpangidaron og 15 anyos paubos i-exempt sa criminal liability.

Hinaut unta nga kini hatagan og importansiya sa kapolisan ug ubang ahensiya sa kagamhanan diin mahisang-at ang maong kaso sa mga menor de edad.

Sa pagkakaron anaay ubay-ubay'ng mga 15 anyos paubos nga nadetenir ug ang uban niini gisagol sa mga banggiitang mga kriminal.