Tanod ba ang nagbantay?

Angay kompirmahon kon unsa ka tinuod kining sumbong sa atong texter nga tag-iya sa cellphone number 0906-5193032 nga igo lang nagpaila sa iyang kaugalingon nga taga Private Sambag I ning dakbayan sa Sugbo.

Ang iyang sumbong mahitungod sa video karera nga anaa mahimutang sa kilid o duol sa tulay. Dili masumpo, matud pa sa atong texter, kining operasyon sa maong video karera tungod kay usa ka barangay official ang nagbutang niini. Gani, usa pa man gayod ka barangay tanod ang nagbantay!

Unsa man kaha kini ka tinuod? Maayong masusi kining alegasyon sa atong texter aron masuta kon tinuod ba kini o dili. Manghinaot kitang dili kini tinuod. Kay kon pananglit tinuod man kini, tulibagbag gayod kaayong pamation. Tiaw ba nga barangay official ang nagbutang sa maong makina sa video karera ug barangay tanod pa gayod ang nagbantay? Pastilan?

* * *

Niay text nga akong nadawat nga klarong naggikan sa usa ka iresponsableng texter nga wala mogamit sa iyang utok. Nadawat nako kining maong text niadtong Hunyo 3, 2006 sa oras nga alas 10:03:42 sa gabii.

Ang text nagkanayon: "Pasensiya na. Totoo po ito. May namatay na. Mag-uso lienta curada sio. Pass this curse message to 19 friends except the sender or else your mother will surely die next week. Sorry, love ko kasi ang mother ko." 0915-7822153

* * *

Ambot kaha kon nakasabot ba ang maong texter kon unsa gyoy buot ipasabot sa pulong mag-uso lienta curado sio. Ako wala makasabot niini. Pero kon tinuod man nga tunglo o maldisyon kini, klarong nagpagamit ang maong texter sa demonyo pinaagi sa pag-among-among sa 19 niya ka higala nga iyang pasahan sa maong mensahe.

Iresponsableng texter ang 0915-7822153? Ang angay unta niyang buhaton sa pagkadawat niya sa maong mensahe mao ang pag-delete niini ug wala na ipasa sa lain aron dili mokaylap. Wala siya maggamit sa iyang utok. Nagtuo tingali siya nga mas gamhanan ang text kay sa pag-ampo. Nag-ampo pa hinuon siya, maayo pa.

(Sumbong ug reklamo? Text sa 0910-8105522)