Negosyo kuno

Nia pa gyoy laing estilo sa modus operandi sa Budol-budol Gang nga angay ninyong masayran. Kuyaw man god kaayo kining maong grupo sa mga mangingilad. Daghan kaayo silag paagi nga himuon aron makabiktima sila sa ilang makursonadahan. Mao nga angay usab kitang masayod sa lainlaing estilo sa ilang modus.

Usa sa ilang estilo mao ang pagduol sa makursonadahan nilang prospective victim ug magpaila ang usa ka negosyante. Hagdon niya ang prospek sa pagpakigsosyo og negosyo uban ang pasalig nga doblehon ang ginansiya sa prospek sa puhonan nga ibubo niini alang sa ilang negosyo.

Unya pakit-on sa suspek ang iyang prospek sa dala niyang bag nga puno sa kuwarta nga budol money nga gipaibabwan lang og pipila ka genuine nga kuwarta. Iyang ingnon ang prospek nga kantidad og P1 million ang maong salapi nga maoy iyang i-invest sa negosyo nga pagasosyohan nilang duha. Iya lang (kuno) nga pabutangon ang prospek og P30,000.00 isip tugbang sa puhonan niyang P1 million og patas ang bahin nila sa ginansiya sa ilang negosyo.

Tungod sa kamaayong mobulatik sa suspek, mapatuo gayod niini ang prospek. Sa higayon nga mopagawas na ang prospek sa iyang P30,000.00 isip counterpart sa P1 million sa suspek, pangayoon sa suspek ang iyang P30,000.00. Unya aron mosalig gayod ang prospek kaniya, kini ang iyang pagguniton sa bag nga gisudlan sa Budol Money.

Mananghid dayon ang suspek nga pahulaton lang ang prospek sa usa ka espisipikong dapit kay may paliton lang siyag kadiyot. Mosanong ang prospek. Pero mabawo lang siyag paabot kay ang suspek dili na man gayod mobalik. Misibat na kini human nadala ang iyang P30,000.

Labaw sa tanan, ulahi na niyang masayran nga Budol Money diay ang sulod sa bag nga gibilin sa suspek kaniya. Ulahi nang tanan kay nakasibat na ang suspek ug dili na niya mabawi ang iyang P30,000 nga nadala niini.

Busa pagbantay kamo niini. Kon adunay tawo o mga tawo nga wala ninyo hiilhi nga mokalit lang pagtanyag og negosyo, ayaw'g kompiyansa kay basin og Budol-budol Gang na kana.

* * *

(Sumbong ug reklamo? Text sa 0910-8105522)