Asa kutob ang imong pagtuo?

Ang Dios Miingon

Pamalandong Matag Domingo

Hunyo 25, 2006: Ikanapulog-duha nga Domingo sulod sa tuig

Mga Pagbasa: Jb. 38:1,8-11/2 Cor. 5:14-17/Mk. 4:35-41

Kahimtang nga tawhanon ang mga hadla sa kinabuhi. Mga panghitabo nga usahay makapangutana kita kon nganong gisungog man gyud ta taman sa ginhawa. Mga hadla ug mga pagsulay nga usahay maoy dakong hinungdan kon nganong kadaghanan nato ang motalaw, madesperado ug mawad-an na og gana. Nasinati ko kaniadto ang dako kaayong kahadlok nga basin mawalay kapuslanan ang akong pagpaningkamot ug mawalay bunga ang akong panlimbasog. Ni-kwestiyon ko sa Ginoo kon nganong taliwala sa akong dakong tinguha nganong daw sa way kasegurohan man ang tanan. Kay abi man gud ninyo, nagtuo man gyud ko nga dili na ko kabalik pa sa seminaryo. Alang nako kadto gyud ang usa sa mga dagkong unos nga mihampak kanako. Diha pa ko masayod ug makaamgo nga "God's ways are far more different from my ways!" Diha pa ko nakaamgo nga ang akong pagduda napulihan og dakong kahingangha.

Ang pagtuo usa ka pakig-relasyon. Maingon nga ang usa ka bata dili bation og kahadlok diha sa kangitngit kon naggunit siya sa mga kamot sa iyang amahan, ang pagtuo usab maoy atong pagpakita og pag-angkon sa atong dakong panginahanglan sa Diosnong pag-amoma. Kon ugaling ikaw magmahay tungod sa trahedya sa kinabuhi, natural lamang nga mopakita ka og pagtukol sa Dios sa kapasikaran nga ikaw tawhanon lamang. Apan ang dugokan ning tanan mao nga ang Dios dili ug dili gayud mobiya kanimo bisan pa man kon ang kalibutan mobiya kanimo. Anaa pay nahabilin og kana ang Dios ug ang imong kaugalingon taliwala sa lawod sa mga pagpanglutos. Kay matud pa sa akong higalang pari: "Rey, mapari naman gyud ka pohon, mao gyud ni ang timan-i nga ang mga pagsulay anaa moabot gyud sa mga higayon, ug takna nga wala nimo palandonga, apan kining mga butanga maoy makahinlo og mas mohingpit pa sa imong motibasyon kon nganong ikaw Magpari!" Dili ba ang bulawan sulayon man diha sa kalayo? Ingon ini usab ang atong pagtuo ug pagsalig.

Usa ka hangyo

Ang akong lindog nga: Sugilandong mobalik paggula sunod semana kini tungod kay ako niuban-uban pa sa mga Misa Pasalamat sa akong mga kaubanan. Salamat sa inyong pagsabot.