Tulis sa taxi

Usa sa midagsang karon mao ang tulis sa taxi. Maoy paboritong biktimahon sa mga suspek ang mga taxi driver. May mga higayon nga magbinugtong ang suspek. Usahay usab, duha o tulo ka tawo ang maghimo niini.

Ang estilo mao nga mopara ang suspek sa taxi nga iyang makursonadahan unya magpahatod ngadto sa usa ka partikular nga dapit. Samtang magdagan ang taxi, ang suspek mangita og tukmang tayming. Inig-abot nila sa dapit nga iyang gituohan nga puyde nang ipasalir ang iyang tinonto, kalit lang niyang hulboton ang iyang hinagiban, tionan ang taxi driver ug modeklarar nga "tulis".

Usa kini sa angay bantayan sa mga taxi driver, ilabi na kon mamasahero sila panahon sa kagabhion. Dili gayod angay mokompiyansa ilabi na kon ang dapit nga pahatdan sa pasahero medyo mingaw, sudlonon, iskuwater o ba kaha layo sa presinto sa kapolisan. Kinsay nasayod nga tulisan diay ang sakay?

* * *

Sa laing bahin: "Moreklamo ko sa mga enforcer diha sa may tulay sa Tabunok kay magpataka lang og dakop bisan wala miy sala. Klaro kaayo nga manguwata sila. Gidakop mi sa sala nga obstruction nga wala man mi ni-park. Hinay ra ang among pagpadagan kay naay mga tawo nga nilabang. Unya naa pay mga sakyanan sa likod namo, wala nila dakpa nga ga-hazard. Nitawag pa gyod sila og police. Gihadlok mi nga posasan basta dili ihatag namo ang license. Nakiglalis gyod mi kay abusado kaayo sila." -- 0917-3415017

* * *

Una sa tanan, akong klarohon nga gipatik ko kining maong text dili tungod kay kombinsido ko sa katinuod sa sumbong. Gipatik ko kini aron magsilbing eye-opener ug aron usab masusi kon unsa kini ka tinuod.

Dili baya ikalimod nga aduna gyoy mga enforcer nga abusado. Makadaghan na ko makasaksi niini nga basta mangatol na gani ang ilang kamot sa pagpanakop, manakop gayod sila bisan sa mga motorista nga walay violation nga nahimo.

Kalabot sa mga enforcer diha sa may tulay sa Tabunok, hinaot nga dili tinuod kining pasangil batok ninyo. Ug ayoha ninyo ang inyong trabaho.

(Sumbong ug reklamo? Text sa 0910-8105522)