Ang gisugot ni Inday

Duha ka mga lalake ang nagdungan og halad sa ilang gugma ngadto sa usa ka maanyag nga dalaga. Ang unang lalake niingon: "Kon imong dawaton ang akong gugma, akong pupoon ang mga bitoon sa langit ug ipurong-purong sa imong agtang ug ang kabukiran latason ko adlaw'ng tanan, malipay ka lang akong pinangga." Samtang ang ikaduhang lalaki nagkanayon: "Kon imo akong sugton, maningkamot ko nga magbinuotan ug makakita dayon og trabaho alang kanimo ug sa atong umaabot nga mga anak." Gisugot sa dalaga ang ikaduhang lalaki nga kaniya nanguyab.

Pamalandong

Sa kaminyoon dili lang paigo ang mga bulawanong gambalay sa usa ka duhiraw kondili mas labing maayo kon lakip na pud niini ang praktikalidad. Dili maayo nga paasahon lang ang kapikas ug mga anak sa mga pulong sa hangin. Kinahanglanon baya pud nila migo, ang kan-on ug sud-an!