Lingiw sa problema

Ang naandang kakuwang sa mga libro, lingkuranan, lawak saringan ug magtutudlo maoy mosugat sa mga tinun-an karong adlawa atol sa ilang pagbalik sa klase. Ang kasagaran hinuon sa mga pampublikong tunghaan sa nasud sa sunod pang Lunes mobalik pagbukas.

Ang maong problema dugay na nga gisagubang sa atong pampublikong tunghaan apan hangtud karon wa gyud mahatagi og kasulbaran. Kini dili tungod kay wa masayod ang gobyerno unsaon pagsulbad niini. Dugay rang nasayod ang gobyerno sa problema ug sa solusyon, apan ang problema mao ang paglingiw sa atong mga opisyal sa problema ug ang pagpakaaron ingnon nga way problema hinungdan nga wa gyud kini masulbad.

Kamatuoran niini, mao ang pagkasaba ni Presidente Gloria Macapagal-Arroyo sa usa ka opisyal sa Department of Education niadtong miaging semana sa dihang mitug-an kini sa tinuod nga sitwasyon sa mga pampublikong tunghaan atol sa usa ka forum didto sa kaulohan.

Gipakauwawan og maayo ni Arroyo ang maong opisyal sa dihang mitug-an ni nga kuwang kaayo sa mga magtutudlo ang pampublikong mga tunghaan ingon man sa mga gikinahanglang mga lingkuranan ug mga lawak saringan.

Inay nga dawaton ang kamatuoran ug buhaton ang angayang sulbad sa problema, nasuko hinuon ang presidente ug gikasab-an ang opisyal sa DepEd hinungdan nga nanglipaghong tawon ang maong opisyal sa kauwaw ug napugos sa pagpamakak pinaagi sa pagbakwi sa una niyang pamahayag.

Kini maoy hinungdan nganong hangtud karon wa gyud masulbad ang maong suliran matagbukas sa klase. Kon kamao pa untang modawat ang atong mga opisyal sa kamatuoran ug atubangon ang problema inay nga ilaron ang katawhan lakip na ang ilang kaugalingon dugay na unta sigurong nasulbad ang maong problema.

* * *

Usa sa mga higala sa Sugbuanong huwis nga gipatay didto sa Cavite mitug-an nako nga naguol karon ang pamilya sa namatay tungod kay namiligrong maabswelto ang mga akusado sa kaso tungod kay wala nay abogado ug piskal nga mitungha sa mga husay sa kaso.

Ang biyuda ni Pasay City judge Henrick Gingoyon gikatahong nangayo og panabang sa mga higala sa iyang bana tungod kay wala na tungaha sa piskal ang mga bista sa kaso. Gitinguha karon sa pamilya ni Gingoyon nga mangayo og panabang sa Free Legal Assistance Group kon FLAG ang grupo sa mga abogado nga andam mohatag og libre nga serbisyo.

Kon tinuod nga wa na tungaha sa piskal ang hearing sa kaso, ang angayang buhaton sa pamilya ni Gingoyon mao ang pagpasaka og reklamo atubangan sa Department of Justice batok sa piskal nga nadistino sa maong kaso.

Wa gani kinahanglana nga mokuha og kaugalingong abogado ang pamilyang Gingoyon tungod kay katungdanan sa atong gobyerno ang paghatag og hustisya sa mga biktima sa krimin. Maayo sab siguro nga ang mga higalang abogado ni Gingoyon dinhi sa Sugbo mosusi kon unsa ka tinuod nga wa na tagda sa piskal didto sa Cavite ang kaso sa gipatay'ng huwis.

* * *

E-mail: [email protected]