Lim ug Lerias

Naunsa man intawon ang lokal nga mga opisyal sa Southern Leyte? Gawas nga napakyas paghatag og makatagbaw nga katin-awan, hain na paingon ang mga hinabang nga ilang nadawat alang sa mga biktima sa bangis nga katalagman, nagpasiugda pa gyod sila og mga eskandalo nga nagpakita nga wa sila mobati og bisan gamay na lang nga kaikog sa nagbangotan pang mga tagtungod sa mga nangamatay ug sa mga naluwas man tuod apan nawad-an sab sa tanan nilang kabtangan.

Labing bag-o nilang pakauwaw: Atubangan sa grabeng kalisod ug pag-antos sa mga molupyo sa Guinsaugon nga wa pa mapahimutang og tarung nga mga pinuy-anan, kasagaran nila wa pa gani igong pagkaon, si Mayor Maria Lim sa St. Bernard niaprobar sa paggahin og P600,000 alang sa "Lakbay-Aral" sa mga pangu sa Sangguniang Kabataan (SK) sa nagkalainlaing mga barangay sa iyang lungsod.

* * *

Laing bag-ong pakauwaw ni Mayor Lim: Gibabagan niyang plano sa Gawad Kalinga (GK) sa Couples for Christ pag-una-una na pagpabalhin sa mga bakwet sa Guinsaugon ngadto sa mga panimay nga nahuman na nila sa pagtukod sa relocation site sa Barangay Magbagacay. Bahala na kon maluag-luag untag dyutay ang evacuation centers ug bahala na kon may makabantay na unta sa kabtangan sa GK nga gihinay-hinayan na sab og hilabot sa mga balhibuon og kamot.

Maoy gusto ni Mayor Lim nga magdungan pagbalhin ang tanang bakwet ngadto sa bag-o nilang mga pinuy-anan. Sa ato pa, kinahanglang humanon una ang tanang kabalayan una makaangkon ang mga biktima og tarung pinuy-anan. Nakapait kay ang Philippine National Red Cross (PNRC), nga maoy niangkon sa laing katunga sa relocation site, wa pang kasugod pagtukod og bisag usa ka haligi na lang.

Hain na mang pagarpar ni PNRC Chairman Richard Gordon nga nagdugo ang iyang kasingkasing alang sa mga biktima? Ug nganong iangin mang Mayor Lim ang tanang bakwet ug ang kakugihan sa GK tungod lang sa kalangayan ni Gordon?

* * *

Nangaging mga bulilyaso ni Mayor Lim: o Gipanghatag niya sa mga polis sa St. Bernard ang labing maayong mga donasyon gikan sa Sugbo ug ubang lugar, ang salin ray gihatag sa mga biktima; ug o Gipasagdan lang niya ang barangay kapitan nga nasakpang nangawat sa mga donasyon sa mga Sugbuanon nga gida sa mga boluntaryo sa Kapamilya Relief Campaign sa DYAB Abante Bisaya.

* * *

Apan kahibawo gyong Ginoo. Nakatilaw sab si Lim sa iyang kaugalingong kabuang. Hangtod karon, padayon siyang naglaway sa walo ka tonelada nga hinabang sa Malaysia alang unta sa Guinsaugon nga giingong gi-hijack sa mga sakop ni Gobernador Rosette Lerias sa Maasin.

Kun tuohan ang mga pasangil batok nila, way mapili nilang Lim ug Lerias. Silay mas dagkong katalagman nga nahiagoman sa ilang katawhan human sa pagkalubong sa tibuok Guinsaugon.

* * *

Email:[email protected]