Manguwarta sa karera?

Adunay nagpadangat kanako og kasayoran pinaagi sa text nga adunay police dinhi sa dakbayan sa Sugbo nga manguwarta sa mga operator sa video karera. Mao kini ang hinungdan, sumala pa sa atong texter, nga dili gayod masumpo sa hingpit ang video karera operations.

Unsa man kaha kini ka tinuod, Tsip? Akong klarohon nga wala ako motuo niining maong taho. Pero wala sab koy nakitang kapasikaran aron magtumo-tumo og sulti ang atong texter nga tag-iya sa cellphone number -0919-4178509.

Ingon sa nadayag pag-ayo ngadto sa atong texter ang modus operandi sa mga operator og video karera. "Kuhaon inigkahapon, ibalik inigkagabii," niya pa sa iyang text kanako.

Pero ang malisyoso gyod nga bahin sa iyang text mao ang iyang pasangil nga mokabat sa P80 mil ang ihatag sa mga operator ngadto sa "dako" sa polis. Morag lisod kining tuohan pero mas maayong masusi kon unsa kini ka tinuod. Makabungol na man god, para nako, kining maong kantidad. Diriyot god ko mahulog sa akong gilingkoran pagkabasa nako sa iyang text nga nagbutyag niining maong kasayoran.

Kinsa man kaha usab kining giingong "dako" sa polis nga maoy nakadawat niining P80 mil nga grasya sa hangin? Manghinaot lang kita nga dili kini tinuod.

Matud pa sa atong texter, Lary ang ngalan sa mohatag og kuwarta ngadto sa polis. Taga Pasil. Kamo na, Sir, ang maantigong magsusi ug moila kon kinsa kining tawhana. Sutaa ninyo ang matuod.

Uso karon ang pagpangisnats diin ang suspek magsakay og awto. Yamat ra, high class kaayo kining maong isnatser. Pagbantay kamo niini. Ang estilo mao nga samtang ikaw maglakaw sa daplin sa dalan, kalit lang may mohunong nga sakyanan sa imong tungod ug labnihon ang imong cellphone, kuwentas ug uban pang mga alahas. Bantayanan pag-ayo kining maong estilo sa modus operandi. Gawas sa mag-awto, naa pa gyoy isnatser nga magmotorsiklo.

(Sumbong ug reklamo? Text sa 0910-8105522)