Ang Suroy-suroy Sugbo maoy solusyon sa lokal nga kagamhanan sa lalawigan ug tanang mga kalungsuran sa Sugbo sa ingon sa nakalimtan nang turismo sa kalungsuran. Nahatagan og igong panahon ug dalan ang mga lungsod sa habagatan, amihanan ug mga isla sa Sugbo nga ipakita ang ilang adunahang tradisyon, nindot nga mga lugar ug buotan nga katawhan.
Usa lang ang Camotes sa mga dapit sa lalawigan sa Sugbo nga dako ang potensyal sa turismo. Makita ang limpyo nga baybayon, puti nga bas ug wala pa matandog nga kalikupan. Sa pagsuroy sa bisan asang parte sa Camotes, ma-obserbahan ang ka-andam ug ang paghinamhinam sa mga tawo nga makasulod sa ilang lugar ang kauswagan pinaagi sa turismo. Daghan pa ang "beach properties" nga wala pa matandog ug nagpaabot pa og mga negosyanteng buot mamuhunan sa maong lugar nga maoy mobukas og laing atraksyon sa dapit ug dugang trabaho alang sa mga taga isla.
Nagpabiling barato pa ang isla sa Camotes alang sa mga bisita, gikan sa preskong isda, "souvenir items" ug "world class facilities" sa mga resorts. Hinuon dili pa maayo ang pipila ka dalan ug tulay sa isla. Apan sa mga turista, dili kini nila igsapayan, ang mahinungdanon nga makapahuway ug makatagamtam sila og dapit nga abunda ang ka-anindot sa kalikupan.
Napili ang Sugbo, niini lang bag-o, isip usa sa napulo ka labing nindot nga isla sa tibuok Asya ug Indian Seas base sa obserbasyon sa mga bakasyonista. Usa kini ka dakong dungog alang sa Sugboanon nga naningkamot nga mas maila ug mapatagamtam ang ilang lahi nga pag-abi-abi sa mga turista.
Haom ang maong pasidungog sa Cebu nga giisip sentro sa turismo sa nasud. Lakip sa mga gihatagan og pagdayeg ang mga isla sa Maldives ug Phuket. Nagpabiling hagit alang sa mga Sugbuanon ang pagpili sa mga turista sa Sugbo isip usa sa labing nindot nga lugar, kung unsa-on sa pagpadayon ug pagpalambo pa sa mga lugar sa Sugbo.
Dili madayeg ang usa ka dapit hangtud nga dili ni mabisita. Mao usab kini ang dakong hagit nga nagpa-abot alang sa tanang Sugbuanon nga sa dili pa mota-ak sa ubang mga dapit sa nasud, mas maayong unahon sa pagbisita ang mga nindot nga mga "tourist destinations" sa Cebu aron makatabang sa ekonomiya sa Sugbo.
Apan ang kalambuan sa turismo sa Sugbo nag-depende sa paningkamot sa katawhan. Sa daghang mga malambuong nasud o lugar, ang turismo ang ilang labing dakong puhunan. Dili matukib ang kalapad ug kadako sa epekto sa turismo alang sa kalambu-an sa usa ka dapit. Nagsubay na ang Sugbo sa hustong dalan aron nga mas maila pa ang mga "tourist spots" sa bisan asang parte sa kalibutan. Apan nagpabiling hagit alang sa tanan ang pag-amping sa kinaiyahan, pag-abi-abi sa mga dayu ug mga bisita ug ang pagsuporta sa mga programang maayo sa turismo.
Nakasiguro ko nga sulod sa pipila ka adlaw, magkapuliki na sa pagdawat sa mga bisita ang mga taga Camotes. Usa ka dakong kalambuan alang sa usa ka simple apan abundang isla.