Reklamo sa mga pasahero sa SBT

Daghan nang mga pasahero padung sa South ang mipadangat sa ilang reklamo nganhi sa ato kabahin sa pipila ka mga porter kon kargador diha sa South Bus Terminal.

Ang ilang reklamo: Mga kargador diha sa SBT mangilog sa karga kon bagahe sa pasahero bisan kini kaya ra kun mahimo rang dad-on sa maong pasahero.

Matud pa sa mga nangreklamo, masuko ang kargador kun dili ihatag kaniya ang karga. Ug kun siya na ang padad-on mangayo kinig dakong bayad. Ug kun dili hatagan sa kantidad nga iyang pangayuon mamalikas kini.

Gipa-obserbahan ning mantalaan ang kalihukan sa mga porter sa SBT ug namatud-an nga tinuod gayud ang reklamo sa mga pasahero.

Dugay na ning maong reklamo. Panahon na tingali nga aksiyonan kini pinaagi sa pagluwat og lagda alang sa maayong pamatasan nga ipatuman sa mga kargador diha sa SBT.