Pagpul-ong aron molambo

Ang Dios Miingon
May 14, 2006; Ikalimang Domingo sa Pasko sa Pagkabanhaw
Mga Pagbasa: Buh. 9:26-31/1 Jn. 3:18-24/Jn. 15:1-8

Mahinumdoman gyud nako ang among kanhiay prefect of discipline sa College Seminary nga sa matag higayon nga dunay general cleaning sa seminaryo, iya gyung suguon ang uban kanamo sa pagpul-ong sa mga sanga sa kahoy. Ang iyang rason mao nga mas maayo og mas tul-id kuno ang pagtubo sa maong mga kahoy. Naobserbahan ko tuod nga tul-id sab baya ang mga tubo nila.

Mahinungdanon kaayong imahen ang atong makutlo gikan ning maong ebanghelyo karong Domingoha. Kabahin kita diha ni Cristo ingon nga punoan sa paras. Tabunok usab ang paghulagway sa Amahan ingon nga tig-atiman sa maong paras. Ang iyang pagpamul-ong, usa ka bililhong timailhan sa iyang pagpakabana sa iyang mga binuhat.

Ingon nga simbahan ug Kristohanon, nahimo kitang hugaw ug naputos sa tumang kadautan. Nahimong hiwi ang atong pagkinabuhi ug nahimong salikwaot ang atong pagbansay sa atong tinuohan.

Sakit baya ang pagpul-ong sa atong mga dautang mga kinaiya labina kon kini mao nay atong naandan. Apan pinaagi lamang ning maong buhat kita mas mahinlo ug mas mahingpit pa gayud diha sa atong pagka-Kristohanon. Maingon nga diha sa pagdisiplina sa atong lawas mabatonan ta ang kahimsog, maingon man usab ang pagdisiplina sa bisan unsang makahasol sa atong pakigsandurot sa Ginoo kita molambo usab sa atong pagka mga anak sa Dios. Sa laktod nga pagkasulti, kita gidapit nga manlimbasog inubanan sa grasya sa Dios nga mamenos-menosan na nato ang atong pagkamalupigon, malaw-ayon, masuk-anon, pagka-himantayon, pagkamayubiton ug uban pa. Kay pinaagi lamang niining yanong mga buhat sa pagdumili sa kaugalingon kita molipang ingon nga mga bahin sa punoan nga mao si Kristo Jesus. Husto tingali si Shakespeare sa iyang pag-ingon: "I need to be cruel in order to be kind."