Politika sa Norte!

Gisulod na ni Cebu Governor Gwen Garcia ang balwarte sa mga Martinez niadtong adlaw nga Biyernes. Gi-angkon sa gobernador nga walay kasudlan ang iyang grabeng kakulba samtang nagpa-ingon palang ang iyang grupo sa Verallo Hospital sa lungsod sa Bogo. Ang maong okasyon ang labing unang higayon nga nahimamat ni Garcia ang mga taga Bogo ug mga silingang lungsod sa kuarto distrito nga wala mosuporta kaniya atol sa miaging pinili-ay. Mga Philhealth cards ang gipang-apod apod ni Governor Garcia sa mga tawo gikan sa lungsod nga nilubong kaniya ug tipa liog atol sa 2004 nga eleksyon.

Gipakita ni Garcia nga hingpit ang suporta sa iyaha dili lang sa mga molupyo sa amihanang Sugbo apan lakip na sa mga mayores sa maong distrito. Init nga gihangop ang gobernadora uban si Vice-Governor Greg Sanchez ni Medellin mayor Ligaya Lim. Bantog nga tigpaluyo sa mga Martinez si Lim. Apan iyang giklaro nga tungod ug alang sa serbisyo ug proyekto nga gihatag sa iyang lungsod, bukas niyang gidawat ug gi-abi-abi ang duha ka dagkong mga haligi sa probinsya. Gipa-aspalto sa probinsya ang dalan sa may Barangay Curva, Medellin paingon sa lungsod sa Daan Bantayan.

Sama sa ubang mga mayor, nagtu-o si Lim nga walay dautan sa ilang pagpadayon sa duha ka mga opisyal sa kapitolyo labi na nga proyekto ang gidalit sa mao nga mga opisyal. Gawas kang Lim, nisugat usab sa grupo ni Garcia ang mayor sa lungsod sa Madridejos, Letty Mancio. Puno sa pasalamat si Mancio sa proyekto nga patubig nga gihatag sa lokal nga kagamhanan sa probinsya. Kuarenta ka tuig na kapin gi-antos sa mga taga isla sa Bantayan ang problema sa tubig apan tungod sa aksyon sa probinsya, matud sa mayor, hingpit nang natagamtaman sa iyang mga tawo ang dugay nang gipangayo nga tubig. Sa pakig-atubang sa gobernador, subling gipadayag sa mayor ang saad nga suporta alang kang Garcia sa sunod nga pinili-ay.

Nakasulod usab sa lungsod sa Bogo ang lain pang kontra sa politika sa mga Martinez nga si Daan Bantayan Mayor Maria Luisa Loot. Gipanawagan ni Loot nga kalimtan na ang isyu sa politika ug panahon na aron tutokan ang pagserbisyo sa katawhan. Apan wala tungaha sa mayor sa Bogo, Celestino Martinez III ang okasyon nga daan nang gipanlantaw sa mga taga Bogo.

* * *

Dakong misyon ang gidawat sa mga mitambong nga mga opisyal sa maong tigum niadtong adlaw nga Biyernes. Buot nilang dugangan ug mga espesyalistang doktor ug mga kahimanan ang Verallo General Hospital sa lungsod sa Bogo aron hingpit na ning maka-alagad sa mga pasyente sa kuarto distrito. Kung tuhu-an ang saad sa mga opisyal, usa kini ka dakong kalambu-an nga angayang pasalamatan sa mga molupyo sa maong lugar. Human sa dugay nang katuigan, kadaghan sa mga kinabuhi nga nakalas tungod kay wala dayon matubag sa mga doktor ug mga pasyenteng nakabsan sa kinabuhi diha sa ambulance paingon sa mga tambalanan sa dakbayan sa Sugbo, usa ka maayong balita ang maong lakang gikan sa mga opisyal sa habagatang Sugbo ug mga opisyal sa kapitolyo.

Apan ang dakong pangutana ug kabalaka karon sa mga residente kung asa ra kutob ang mao nga plano. Lahi ang plano ug lahi ang tukmang lakang. Dili mabasol ang mga tawo nga nagduda kung mahimo ba ang planong komplituhon ang ospital gumikan kay dugay na ang maong problema ug daw sa gikalimtan ug gitay-an na sa panahon.

Nagpabiling usa ka dakong hagit alang sa mga opisyal nga nisulod sa lungsod sa Bogo nga kalimtan na ang isyu sa politika ug panahon na aron mo serbisyo sa katawhan pinaagi sa pagkompleto sa kahimanan ug mga tawo sa tambalanan. Maisip nga kalampusan ang pagsulod sa maong mga kontra partido sa balwarte nga giisip nga dili ila, apan ang tinu-uray nga sukod sa kalampusan mao ang pagtuman sa mga saad dili aron pangandaman ang sunod nga pinili-ay apan aron tubagon ang batakang panginahanglan sa katawhan.