Amo ni Yap

Dihang gitudlo sa mga sakop sa board sa Mactan-Cebu International Airport Authority (MCIAA) si Heneral Adelberto Yap isip general manager Pebrero sa niaging tuig, nahibawo na silang daan nga wa siya maghupot sa gikinahanglan nga civil service eligibility. Kay kon wa, nagpabaya sila sa labing batakang gimbuhaton pagsusi sa katakos sa opisyal nga ilang gibutang sa labing mahinungdanong katungdanan sa tugpahanan. Dihang gitudlo nilag balik si Yap sa samang katungdanan karong tuiga, mas naklaro nang malisya. Kay gawas nga gikuwestiyon na sa Civil Service Commission (CSC) ang kakuwang niyag eligibility, ang MCIAA board nakasinati na ning maong bulilyaso sa wa pa si Yap: Nanghilam-os sila sa kauwaw dihang gipalagpot sab sa CSC ang ilang gipamugos pagka general manager sa MCIAA, si Angelo Verdan, kinsa samang Yap, wa say eligibility.

* * *

Kon gipasidan-an kang nakalapas sa balaod, apan imo gihapong gihimo ang samang kalapasan nga imo nang nahimo niadto, nga nisangpot gyod gani sa makauuwaw nga kayagaw ug kauwawan nga nakapapugos nimo pagbakwi sa kalapasan nga imong nahimo, duna kay dakong problema:

o Mahimong labihan kalimtanon nga human napaso ang imong kamot sa nagbaga nga sugnod, gihakop na sab nimo sa laing kamot ang laing nagbaga nga sugnod;

o Mahimong wa kay pagtahud sa balaod (nga makapa-alarma kon ikay gitugyanan pagpatuman sa balaod); o

o Mahimong dako kaayong grasya nga nadawat bugti sa nahaunang kalapasan maong, bahala nag mapaso ug mauwawan pag-usab, nangahas na sab paghimo sa samang kalapasan bugti sa mas dako pang grasya, nga mahimong gisaad pa o nadawat na.

* * *

Maong di magamit ni Gobernador Gwen Garcia nga argumento ang dakong papel ni Yap sa pangandam sa ASEAN Summit karong Disyembre aron ipamugos siya sa katungdanan nga wa siyay katungod sa paghupot. Kon wa pa malikoy ang utok sa mga sakop sa MCIAA board, ang qualified untang aplikante ang ilang gitudlo ug malikayan unta kining maong komplikasyon.

Silay nagmugna sa suliran. Inay gamiton ang suliran nga sukaranan sa pagpadayon sa kadudahan nga pagsabak-sabak nilang Yap, angayng ipatin-aw nilang Garcia ug ubang mga sakop sa board ang makauuwaw nilang paugat.

* * *

Duna nay nag-ung-ong nga kaso sa Visayas Ombudsman batok nilang Garcia ug kaubanan tungod sa ilang pagpapating pagtudlo ni Yap. Tungod hinuon sa kalangayan ug sa seryusong pagduda sa kaligdong sa Ombudsman, labi na kon dagko nag sapatos ug sikit na kaayo sa luwag ang mga hingtungdan, mahimong lawalawaan ug siyam-siyaman lang ang kaso.

Makaayo sa tanang hingtungdan kon sa labing daling panahon tubagon sa mga sakop sa MCIAA board kining yano kaayong pangutana: Kinsa may tinuod nilang amo-ang mga Sugbuanon, nga mas kaalagaran kon subayon ang makiangayong panginahanglan sa civil service eligibility, o ang padrino ni Yap?

Email:[email protected]