At buwan din itong masaya ang lahat;
Sa bayan at nayo’y ating mamamalas
Ang mga balwarte’y may bagong pahiyas!
Sa mga lugaring buhay pa ang batis
Mga bangka roo’y palaging malinis;
Mga namamangka’y binatang makisig
At ang kasama n’ya’y dalagang marikit!
Sila’y sumasagwang may ngiti sa labi
At ang ilaw nila’y buwang nakangiti;
May mga bituing sumisilip lagi
Sa siwang ng dahong sariwa palagi!
Sa mga probins’ya’y ating makikita
Na namumulaklak mga punong mangga;
Ito’y mababangong ang sanghaya’y iba
Pagka’t mamumungang sariwa’t sagana!
Sa loob ng hardin ang mga bulaklak
Ay nag-uunahan sa biglang pagbukad
Kaya mga ito’y pinuputi agad
Upang sa simbaha’y ialay ng dilag!
Sapagka’t bakasyon ang mga eskwela
Ay nagpapasyalan na barka-barkada;
Bata at teenagers sa mga kalsada
Nagsisipaglaro’t nagsisigawan pa!
Kung Linggo ay puno ang mga simbahan
Ng mga pamilyang doo’y nagdatingan;
Dalaga’t binata ay nasa luhuran
Kapwa sumusumpang tapat sa suyuan!
At higit sa lahat ang dala ng Mayo
Ay ulang pambuhay sa halama’t damo;
Ang unang ulan daw kung buwang ganito
Dapat ipaligo ng lahat ng tao!