Ang tolomanon- pahasubo alang kang Mayor Chiong

Naalad, Naga, Cebu

Sa miaging Lunes sa alas 2:00 ang takna sa hapon maoy pagsugod sa misa pahinungod sa kamatayon ni Mayor Ferdinand Mendiola Chiong. Paglabay sa usa ka takna gidala-gilayon ngadto sa atubangan sa munisipyo aron adto himoa ang tulomanon-pahasubo.

Ang unang mihatag og pakigpulong mao si Kongresista Eduardo Gullas diin iyang gipasalig nga tumanon niya ang iyang gisaad ngadto kang Chiong nga himoong siyudad ang Naga. Kining iyang gisulti silbing subli sa iyang gisulti atubangan namong mga taga K of C sa Naga komo kining tagsulat usa man sa mga Past Grand Knight sa maong pundok.

Gibatbat ni Gullas ang kinaiya sa pagkamatinud-anon ni Chiong labot sa iyang katungdanan isip mayor sa lungsod sa Naga. Ang pagkakugihan niini ilabi na niadtong panahon nga bag-o pang gisugdan ang pagtrabaho sa Reclamation Project nga halos na gani makalimot sa pagkaon aron pag-atiman sa maong gimbuhaton.

Sa iyang bahin si Gobernador Gwen Garcia, diin daghang nahinunot sa iyang kinasingkasing nga paghilak diin gibatbat niya ang dakong utang kabubut-on ngadto kang Chiong tungod kay ang daku niyang alkansi sa mga botos didto sa amihanang dapit ning atong lalawigan sa miaging eleksiyon, nabawi dinhi sa lungsod sa Naga.

Tungod niana, atubangan sa patay'ng lawas ni Chiong ug sa linibong katawhan nga mitambong sa miaging Lunes sa hapon, iyang gisaad nga matigayon gayod ang paghingpit sa mga pantalan sa Sugbo, Bohol, Negros, Siquijor ug Leyte aron sa ingon nga paagi magmabungahon pag-ayo ang negosyo sa maong mga lalawigan.

Sa akong pakigsulti kang Mayor Soc Fernandez, sa samang higayon akong kauban sa SUKNA kun Sugbuanong mga Komentaristang Nagpakabana, misulti nga sila si Chiong kauban kaniadto sa seminaryo. Silang duha wa molampos sa pagkapari, apan tungod sa drama sa kinabuhi silang duha gipadala sa Ginoo sa papel nga mahimong Mayor sa tagsa-tagsa nila ka dapit nga mao ang lungsod sa Naga diin siya ang napili nga Mayor ug ako sa dakbayan sa Talisay nga napili usab nga Mayor.

Miingon si Brod Soc nga miila siya nga tinooray'ng pagbati ang katawhan Naganhon tungod sa linibo ka tawo nga iyang nasaksihang nagpatulo sa ilang mga luha.

Si konsehal Dominga Paunil Millena, bugtong konsehal nga akong gikabagat niadtong higayona diha atbang sa karaang sam-ang sa Naga nag-ingon nga ang tugon ni Chiong ubos sa katarungan nga ang iyang amahan, ug ang duha niya ka uyuang Mayor, si Rening ug Inting Mendiola, anaa man ilubong anha lang usab siya magpalubong. Gipangahasan ko lang gyud pagpangutana si Konsehal Millena kon unsay iyang ikasulti labot sa kamatayon ni Chiong, kay bag-o lang akong migawas sa dapit-kan-anan nga gipanag-iya ni SPO2 Cornelio Parami, nga nasaksihan ko ang pagkahurot sa walo ka libo ka puso. Sabton nga walo gyud ka libo ka tawo ang didto sa sulod sa maong kan-anan kay napanid-an man nako nga walay nakadawat og sobra sa usa ka puso ug sa mga tawo nga didto sa gawas sa maong kan-anan nga wa pa makakaon sobra man kadto sa duha ka libo ka mga tawo.

Human sa iyang gisulti, wa na niya madugangi tungod kay mibuhagay pag-ayo ang wa kapugngi niyang mga luha. Salamat nga miabot ang among Grand Knight sa Naga K of C Council 3940 nga si Sir Knight Bert Villena nga maoy miayom-ayom ni Millena pinaagi sa pag-ingon: ato na lamang siyang itugyan ngadto sa atong Labaw'ng Makagagahom uban sa usa ka pangamuyo nga mahidangat siya ngadto sa pahulayang dayon.