Kagawasan

Nitingog na ang Supreme Court ug gisupak ug gibasura ang kontrobersyal nga Calibrated Pre-emptive Response o CPR. Matud sa Korte Suprema, ilegal ug walay igong sukaranan base sa konstitusyon ang lakang sa administrasyong Arroyo sa pagbungkag sa mga welga ug protesta batok sa gobyerno. Dugang sa labing taas nga Korte, gigamit lang nga taming sa mga pulis ang CPR aron sa pagpukan sa mga welga batok kang Presidente Arroyo.

Karon, hingpit na ang kagawasan sa mga tawo nga ipadayag ang ilang mga kaligotgot, reklamo o dili ba kaha pagdayeg sa gobyerno. Apan matud sa Korte Suprema, kinahanglan nga mokuha og permiso ang mga raliyista gikan sa mayor aron mahimong legal ang ilang pagpahigayon og rally. Gikinahanglan usab mohatag og publikong lugar (freedom park) ang lokal nga kagamhanan kung asa ipahigayon ang rali.

Sa ikaduhang higayon, gibaraw na usab ang gobyerno ni Presidente Gloria Arroyo sa Korte Suprema. Una nang gibasura sa labing taas nga hukmanan ang Executive Order 464. Sa duha ka mga lakang sa administrasyong Arroyo nga gipakaway bili sa Korte Suprema, nagduda ko nga basin moabot sa punto nga dili na unya tuhu-an sa publiko ang mosunod nga mga lakang ni Presidente Arroyo labi na kung may kalabutan sa kagawasan sa pagpadayag sa tagsa-tagsa ka opinyon ug baruganan.

Atol sa pagpatuman sa CPR, dili maihap ang mga tawo nga nangabasa, nakulatahan, nagkadugo. Usa sa mga biktima ang kanhi Bise Presidente Teofisto Guingona. Ang CPR maoy tataw nga pagpildi sa kagawasan sa usa ka tawo nga makapagawas sa iyang gibati batok sa gobyerno. Daghang misupak kaniadto sa pagpatuman sa CPR tungod kay tataw kini nga pagyatak sa katungod sa tawo.

Apan ang mga pulis ug ang Department of Justice (nga usahay makapangutana ta kung tinu-od ba nga nagbitbit sa hustisya alang sa tanan), nibarog ug gipamugos nga husto ang ilang mga lakang. Akong nahinumduman kani-adto unsa ka kagubot ang mga welga ug demonstrasyon batok kang Presidente Arroyo. Gibarugan kani-adto sa gobyerno nga husto ang ilang pagbungkag sa mga rally ug makatarunganon ang ilang pag-abog sa mga raliyista pina-agi sa kusog nga tubig sa bombero.

Karon nga gibasura sa Korte Suprema ang CPR, kalimtan nalang ba ang mga samad nga hatod sa pisikal nga pagbungkag sa mga raliyista? Isipon nalang ba nga kabahin sa kasinati-an ang dugu-on nga nahitabo sa mga militanteng grupo ug sa mga ordinaryong tawo nga nipadayag sa ilang kaligotgot sa gobyerno? Kung walay hustisyang makab-ot ang mga tawo nga biktima sa ilegal nga CPR, nagpasabot lang ni sa kahuyang sa proseso sa hustisya sa nasud. Kung ibutang lang sa limot ang mga uwat sa samad nga nahi-aguman, nagpasabot lang ni unsa ka hanap ang padulngan sa nasud.

"Hit and run". Kini ang tukmang paghulagway sa gobyernong Arroyo sa pagtubag sa mga tawo nga nipadayag sa ilang kasubo ug reklamo sa pagpadagan sa gobyerno. Dakong sagpa alang sa administrasyong Arroyo nga nipatuman og usa ka lakang nga sa kaulahi-an napamatud-ang ilegal. Dili halayo ang posibilidad nga moabot ang panahon nga kung mopagawas og bag-ong mando si Presidente Arroyo, dili na ni tuhu-an sa katawhan. Irason unya sa mga tawo, labi na sa mga padayong mi-kwestyon sa pagkalihitimo sa gobyernong Arroyo ang pagbasura sa E.O. 464 ug CPR.